Андрэй Саннікаў: «Лукашэнку пара сыходзіць, каб не даводзіць народ да паўстання»

Беларускі дыктатар губляе кантроль не толькі над краінай, але і над сабой, лічыць лідэр «Еўрапейскай Беларусі».

Сёння стала вядома, што 8 траўня Аляксандр Лукашэнка прывёз на саміт Арганізацыі дамовы аб калектыўнай бяспецы ў Маскве заяву, падпісаную экс-прэзідэнтам Кыргызстана. У ім Курманбек Бакіеў, які атрымаў палітычны прытулак у Беларусі, ставіць пытанне аб уводзе ў Кыргызстан воінскага кантынгенту АДКБ. Гэтую інфармацыю пацвердзіў генеральны сакратар АДКБ Мікалай Бардзюжа. Аднак, па яго словах, кіраўнікі дзяржаў Арганізацыі нават не сталі разглядаць зварот Бакіева.

«Лукашэнка губляе кантроль не толькі над краінай, але і над сабой. Больш дурных прапаноў рашэння сітуацыі ў Кыргызстане складана сабе ўявіць. Ён выступае як экстрыміст і спрабуе развязаць вайну ў Сярэдняй Азіі, у якую, натуральна, будзе ўцягнутая беларуская армія як удзельніца АДКБ.

Дыктатар у чарговы раз дэманструе, што яго ўвогуле не хвалююць нацыянальныя інтарэсы Беларусі. Матывы такіх яго паводзінаў распазнаць нескладана. Ён баіцца кіргізскага варыянту ў Беларусі. Напэўна, беларускі кіраўнік разумее, што пасля прызнання часовага ўрада Кыргызстана Расеяй бессэнсоўна правакаваць тую ж Расею на ўдзел у яго экстрэмісцкіх планах», - лічыць лідэр грамадзянскай кампаніі «Еўрапейская Беларусь» Андрэй Саннікаў.

На думку палітыка, з гэтай сітуацыі можна зрабіць два вывады. «Па-першае, менавіта Лукашэнка завёў Беларусь у АДКБ, якая можа за адзін дзень памяняць ўладу ў любой постсавецкай краіне. І, па-другое, беларускаму дыктатару пара добраахвотна сыходзіць, каб не даводзіць народ да паўстання», - упэўнены Саннікаў.