Таямнічы візіт Мясніковіча ў Ізраіль
37- 10.06.2011, 12:21
![Таямнічы візіт Мясніковіча ў Ізраіль](https://i.c97.org/p/20110318_myasnikovich_t.jpg)
Учора павінен быў завяршыцца візіт прэм'ер-міністра Беларусі Міхаіла Мясніковіча ў Ізраіль.
Аб падрабязнасцях знаходжання кіраўніка ўрада ў Ізраілі пакуль не паведамляе ні адна афіцыйная крыніца краіны. «Народнай Волі» сталі вядомыя некаторыя нюансы гэтага візіту.
Напрыклад, тое, як ляцеў Міхаіл Мясніковіч ў камандзіроўку, заяўленую праз дзень пасля ягонага адлёту ў Ізраіль як рабочы візіт у гэтую краіну.
Работнікі менскага аэрапорта да гэтага часу абмяркоўваюць, як вылятаў з Беларусі прэм'ер-міністр.
- Ён ляцеў як прыватная асоба, без аховы, якая, напэўна, павінная суправаджаць другую асобу дзяржавы, - распавялі ў аэрапорце. - Больш за тое, вылятаў Мясніковіч разам з жонкай эканом-класам, самалётам ізраільскай авіякампаніі «Эль Аль». Распавядаюць, што калі камандзір карабля даведаўся, што адзін з пасажыраў рэйса - прэм'ер-міністр Беларусі, тут жа прапанаваў Мясніковічу і ягонай жонцы месцы ў бізнес-класе. Натуральна, без даплаты, за кошт кампаніі. Але Мясніковіч ветліва адмовіўся.
Вось і думай цяпер: ці тое Мясніковіч ў перыяд крызісу такім чынам паказаў міністрам і іншым дзяржслужбоўцам, як трэба эканоміць, ці тое візіт гэты быў прыватны, а не працоўны. Хоць учора ізраільскі партал IzRus са спасылкай на беларускую амбасаду ў Тэль-Авіве паведаміў, што Міхаіл Мясніковіч сустрэўся з прэзідэнтам Ізраіля Шымонам Перэсам і намеснікам прэм'ер-міністра - міністрам замежных спрвааў Ізраіля Авігдорам Ліберманам.
У Беларусі пакуль аб гэтых сустрэчах нічога не паведамляецца. Маўчыць нават афіцыйны сайт беларускага ўрада.