Актывісты апазіцыі павіншавалі Севярынца з днём нараджэння
8- 31.12.2012, 11:09
Павіншаваць палітвязня, які адбывае пакаранне ў вёсцы Куплін Пружанскага раёна, прыехалі актывісты апазіцыйных арганізацый.
«Сёння прыехалі больш за 30 чалавек: брэсцкія «маладыя дэмакраты», менскія маладафронтаўцы, людзі з Салігорску, Гродна, Валожына. Былі бенгальскія агні, вогнішча. Бацькоў няма, яны ў Віцебску, у мяне былі раней. Перадачу з Польшчы яшчэ не перадалі. Гэта салідарнасць. Я ведаю, што пасылкі даслалі і іншым сем'ям палітвязняў. Гэта вельмі добры крок з польскага боку. Палякі ведаюць, што такое салідарнасць», - сказаў Павел Севярынец у інтэрв'ю «Радыё Рацыя».
Бацькі палітвязня не выключаюць, што гэта тая пасылка, якую адправіў прэзідэнт Польшчы Браніслаў Камароўскі. Як паведаміў напярэдадні бацька Паўла Севярынца Канстанцін, у пасылцы былі ў тым ліку цёплыя рэчы - кашуля, пальчаткі і берцы.
Павел Севярынец быў затрыманы пасля акцыі пратэсту супраць фальсіфікацыі прэзідэнцкіх выбараў 19 снежня 2010 года. У траўні 2011 года ён быў асуджаны на тры гады абмежавання волі па крымінальнай справе аб масавых беспарадках у Менску 19 снежня 2010 года. Зараз адбывае пакаранне ў вёсцы Куплін Пружанскага раёна.
Фота - «Наша Нiва»