Полудзень адседзіць па поўнай

Былога намесніка кіраўніка МУС абвінавацілі яшчэ і ў атрыманні хабараў.

У дачыненні да былога намесніка міністра ўнутраных спраў распачатая новая крымінальная справа. Пра гэта паведамілі ў аддзеле інфармацыі і сувязі з грамадскасцю Следчага камітэта.

Следчым камітэтам выяўленыя новыя факты супрацьпраўнай дзейнасці Я. Полудня, паведамілі ў аддзеле інфармацыі. У прыватнасці, усталявана, што былы намеснік міністра «сістэматычна на працягу доўгага перыяду часу атрымліваў ад службовых асоб органаў унутраных спраў матэрыяльныя каштоўнасці і грашовыя сродкі».

У сувязі з гэтым у дачыненні да Я. Полудня ўзбуджаная крымінальная справа па прыкметах злачынства, прадугледжанага ч. 3 арт. 426 КК (перавышэнне ўлады або службовых паўнамоцтваў асобай, якая займае адказную пасаду). Новая крымінальная справа злучаная з раней распачатай.

Нагадаем, Яўген Полудзень быў затрыманы ў пачатку снежня 2011 года. У дачыненні да яго была распачатая справа па ч. 3 арт. 424 Крымінальнага кодэкса (злоўжыванне ўладай або службовымі паўнамоцтвамі). А ў канцы снежня ён быў вызвалены ад пасады намесніка міністра ўнутраных спраў - начальніка міліцыі грамадскай бяспекі ў адпаведнасці з указам прэзідэнта. У якасці прычыны паказвалася «здзяйсненне правіны, што дыскрэдытуе званне супрацоўніка органаў унутраных спраў». На месца Полудня нядаўна быў прызначаны Мікалай Мельчанка, які да гэтага з'яўляўся намеснікам начальніка УУС Менаблвыканкама - начальнікам міліцыі грамадскай бяспекі УУС.

Намеснікам кіраўніка МУС - начальнікам міліцыі грамадскай бяспекі Яўген Полудзень быў прызначаны 4 жніўня 2009 года.