Еўрапарламентар патрабуе вызваліць Сяргея Каваленку
1- 16.02.2012, 17:09
Еўрапарламентар Марэк Мігальскі звярнуўся да старшыні Вярхоўнага суда РБ Валянціна Сукалы з просьбай змяніць меру стрымання Каваленку.
Мігальскі паказаў, што Каваленка не здзейсніў цяжкага злачынства, а ягонаму здароўю пагражае небяспека з-за галадоўкі.
Марэк Мігальскі просіць адпусціць палітвязня, каб той мог атрымаць кваліфікаваную медыцынскую дапамогу.
Прыводзім тэкст ліста:
«Старшыні Вярхоўнага Суда
Рэспублікі Беларусь
Сукалу В.А.
вул. Леніна, 28
220030 Менск
Рэспубліка Беларусь
Cергей Каваленка, арыштаваны 19 снежня 2011 года ў межах узбуджанай у дачыненні да яго справы па артыкуле 415 Крымінальнага Кодэкса Рэспублікі Беларусь (ухіленне ад адбывання пакарання ў выглядзе абмежавання волі), у цяперашні час знаходзіцца ў зняволенні ў турме «Следчы Ізалятар № 2» у г. Віцебску.
Як мне стала вядома, стан здароўя Сяргея Каваленкі крытычны, ягонае жыццё знаходзіцца пад пагрозай. З моманту арышту ён вядзе галадоўку, якая працягваецца ўжо 59-ы дзень. Каваленка адмовіўся ад прымусовага кармлення.
Сітуацыя, якая склалася, пагражае не толькі здароўю Сяргея Каваленкі, але і ягонаму жыццю. У сувязі з гэтым, я звяртаюся да вас з заклікам змяніць Каваленку меру стрымання і адпусціць яго пад падпіску аб нявыездзе. Гэта дазволіла б аказаць яму кваліфікаваную медыцынскую дапамогу.
Хачу звярнуць таксама Вашую ўвагу на факт, што Каваленка не здзейсніў цяжкага злачынства.
З павагай,
Марэк Мігальскі
Дэпутат Еўрапейскага Парламента»