Лукашэнка: Вынікі «Еўрафэсту» былі падтасаваныя

Беларускі дыктатар палічыў «па-чэснаму».

Вынікі фіналу конкурсу «Еўрафэст» апынуліся падтасаванымі. Пра гэта заявіў Аляксандр Лукашэнка 24 лютага на нарадзе па выніках правядзення фіналу Нацыянальнага тэлевізійнага музычнага праекта «Еўрафэст», перадае БелТА.

«Сумна, вядома, што нам даводзіцца на ўзроўні Прэзідэнта займацца падобнымі пытаннямі. Але пытанне як раз не заключаецца ў тым, каб займацца нейкімі еўрафэстамі ці нават конкурсам «Еўрабачанне». Пытанне, якое выносіцца на ўзровень Прэзідэнта, зусім у іншым - пытанне ў справядлівасці», - сказаў ТНП.

«Я думаю, прысутным тут няма неабходнасці тлумачыць, што стрыжнем ўсёй маёй палітыкі з'яўляецца пытанне справядлівасці. Гэта галоўнае, гэта пераважае ўсе прынцыповыя крытэры дзейнасці суб'ектаў гаспадарання, грамадзянаў нашай краіны, чыноўнікаў і гэтак далей», - нагадаў Лукашэнка.

«Мы заявілі аб тым, што будзем удзельнічаць у «Еўрабачанні». Гэта было зроблена даўно. І дрэнна-добра, у дзіцячым - лепей, ў дарослым, можна сказаць, ніяк, але вынікі нейкія былі. І пытанне, можа быць, тут не столькі складаецца ў тым, хоць гэта важна, каб перамагчы. Пытанне складаецца ў тым, што ёсць такая краіна Беларусь, цывілізаваная краіна, цэнтр Еўропы, якая прымае ўдзел у падобных міжнародных форумах», - адзначыў Аляксандр Лукашэнка.

Ён працягнуў: «Я папрасіў не без згоды і жадання Аляксандра Шакуціна (кіраўнік ААТ «Амкадор». - Заўвага. БЕЛТА), каб ён, міністр культуры і кіраўнік Белтэлерадыёкампаніі арганізавалі годна гэты працэс у нашай краіне і вызначылі тых, хто годна можа прадставіць нашую краіну на гэтым конкурсе».

«Як мяне інфармавалі, не публічна, у прыватным парадку, працэс ішоў, прыгожа ўсё. Так, насамрэч, карцінка была прыгожая на тэлебачанні, арганізавана гэта было нармальна. Наколькі я інфармаваны, Аляксандр Васільевіч Шакуцін дапамагаў, і фінансава у тым ліку, арганізоўваць гэты конкурс», - распавёў ён.

«Вы вызначылі крытэры (не я іх вызначаў), што гледачы і журы, як гэта і на «Еўрабачанні» будзе, вызначаць лепшага. У выніку што атрымалася? У выніку ўсё атрымалася наадварот. Вы стварылі патавую сітуацыю, сітуацыю, якая характарызуе ўсіх траіх непрыстойна», - падкрэсліў дыктатар.

«Як мяне інфармуюць ўжо дзве групы, якія па маім даручэнні гэтым займаліся, вынікі фіналу конкурсу апынуліся падтасаваныя. Не ведаю, навошта і чаму. Гэта мы разбярэмся, калі не тут, то ў межах крымінальнай справы. Даравання нікому не будзе. Таму я прапаную вам не цямніць», - сказаў Лукашэнка.

Ён працягнуў: «Вынікі падтасаваныя, не ведаю навошта. Падставілі гэтую дзяўчынку, таленавітую спявачку. Не ведаю, як вы з ёй будзеце разбірацца цяпер. І пакрыўдзілі гэтых хлопцаў, якія фактычна апынуліся па вашых крытэрах пераможцамі. Яшчэ раз падкрэсліваю: пытанне ў справядлівасці. Сказалі: будзе так, чаму зрабілі наадварот?».

Аляксандр Лукашэнка адзначыў, што другое пытанне: фінансавы бок, які ён даручыў адначасова разгледзець: «Я здзіўлены, Генадзь Браніслававіч (кіраўнік Белтэлерадыёкампаніі. - Заўвага. БЕЛТА), вы кожны дзень мне пішаце лісты аб цяжкім фінансавым стане вашай кампаніі. Так вам што, грошы няма куды дзяваць? Я павінен міма кіраўніка выходзіць. Я ж публічна вам туды прызначыў намесніка - вочы і вушы прэзідэнта. І вы, тым не менш, без яе ведама марнуеце мільярды рублёў незразумела на што. Вам што грошы няма куды дзяваць? Журналісты скардзяцца - заробак не плаціце, як трэба. Гэта другое пытанне, на якое я хачу атрымаць адказ».

Кіраўнік падкрэсліў, што гэта будзе навука для ўсіх, хто сёння займаецца адукацыяй і культурай: «Там не ўмеюць лічыць грошы, таму што яны іх не зарабляюць».