Станіслаў Шушкевіч: «Тое ж самае будзе з Чэмпіянатам свету па хакеі»

Былы старшыня Вярхоўнага Савета Беларусі Станіслаў Шушкевіч пракаментаваў рашэнне аргкамітэта лонданскай Алімпіяды не даваць акрэдытацыю Лукашэнке.

Як сказаў «Радыё Свабода» Станіслаў Шушкевіч, ён да гэтага часу застаецца ў спісе невыязных з Беларусі і вымушаны ездзіць за мяжу праз Расею:

«Як можна пускаць такога чалавека ў Лондан? Так што правільна зрабілі. Туды пускаюць прыстойных людзей. А тут з гэтым ёсць праблема. Гэта першы крок. Потым тое ж самае будзе і з Чэмпіянатам свету па хакеі. Яны гэта цярпець не будуць. Чаму беларускія ўлады не выпускаюць з Беларусі ў парушэнне канстытуцыі? Вось кажуць: не парушай законаў, не парушай Канстытуцыю. Будзеш прыстойным чалавекам - пусцім. Але гэта немагчыма ў яго выпадку».

Нагадаем, як раней паведамляў сайт charter97.org, арганізатары Алімпійскіх гульняў адмовілі ў акрэдытацыі Аляксандру Лукашэнке.

Пра гэта паведаміў у сваім акаўнце ў Твітэры старшыня Алімпійскага камітэта Расеі Аляксандр Жукаў.

«Прэзідэнту НАК Беларусі аргкамітэт Алімпіяды ў Лондане не даў акрэдытацыю», - напісаў ён.

Беларускі кіраўнік знаходзіцца ў «чорным спісе» Еўразвяза з-за рэпрэсій супраць апазіцыі, фальсіфікацыі выбараў і парушэння праў чалавека ў Беларусі. Яму, як і больш, чым 200 іншым беларускім чыноўнікам і бізнэсмэнам, забаронены ўезд на тэрыторыю краін ЕЗ.

На адкрыццё лонданскай Алімпіяды прыбудзе рэкордная колькасць кіраўнікоў дзяржаў - прыкладна 120.