РЖД заблакавала пастаўку нафты ў Беларусь

Беларускія кампаніі вымушаныя прыпыніць вытворчасць сублімаваных нафтапрадуктаў з расейскай нафты.

Аб гэтым заявіў агенцтву «Інтэрфакс-Захад» прадстаўнік адной з профільных беларускіх кампаній.

«Расейская чыгунка не дае згоды на прыёмку і адпраўку нафты ад расейскіх нафтатрэйдэраў. Дэ-факта пастаўкі сыравіны для растваральнікаў заблакаваныя і гэты бізнэс у Беларусі прыпыніўся», - сказаў ён.

Акрамя таго, па яго звестках, «на гэтым тыдні ў Беларусі працавала міжведамасная камісія з афіцыйных прадстаўнікоў шэрагу расейскіх дзяржструктур, у тым ліку ФТС, з мэтай праверкі легальнасці і празрыстасці вытворчасці і экспарту растваральнікаў». «Вынікі працы камісіі сёння разглядаюцца ў Маскве. Верагодна, у бліжэйшы час варта чакаць нейкіх афіцыйных рашэнняў расейскага боку», - лічыць суразмоўца.

Ён мяркуе, што пакуль беларускія трэйдары працягваюць вытворчасць сублімаваных нафтапрадуктаў з рэшткаў раней закупленых партый нафты, але канстатуе, што новыя пастаўкі адсутнічаюць.

Міжнароднае коштавае агенцтва Argus са спасылкай на трэйдараў таксама паведаміла, што адгрузкі нафты з Расеі ў Беларусь прыпыненыя. «Фармальна абмежаванняў не было, але пастаўшчыкі ўсё зразумелі па погляду прэм'ера падчас прагляду навін», - цытуе агенцтва аднаго з трэйдараў. Паводле інфармацыі ўдзельнікаў рынку, лёс паставак нафты ў Беларусь пакуль не вырашаны. Ліпеньскія партыі ўжо адпраўленыя, але ў жніўні чыгуначных паставак прадукту ў рэспубліку не чакаецца.

У Беларусі з расейскай нафты вырабляюцца растваральнікі, экспарт якіх не абкладаецца пошлінай. За 5 месяцаў гэтага года экспарт гэтых прадуктаў нафтахіміі з Беларусі перавысіў 2 млн тон на суму каля $2,2 млрд. Кіраўніцтва РФ неаднаразова выказвала заклапочанасць рэзкім ростам экспарту растваральнікаў з тэрыторыі Беларусі, а адказныя расейскія чыноўнікі публічна выказвалі падазрэнні, што па эканамічнай сутнасці экспарт гэтых тавараў уяўляе сабой рээкспарт расейскіх нафтапрадуктаў без выплаты экспартных пошлін у бюджэт РФ. Прэм'ер-міністр Расеі Дзмітрый Мядзведзеў 18 чэрвеня ў Менску заявіў аб намеры «дасканала разабрацца» з гэтым пытаннем.

Раней трэйдары чакалі ўвядзення пошліны на гэты прадукт, які актыўна экспарціраваўся праз прыбалтыйскія тэрміналы.

Вытворчасць і экспарт растваральнікаў, якія фармальна не адносяцца да нафтапрадуктаў, сталі адным з асноўных крыніц станоўчай дынамікі эканомікі і прафіцыту знешняга гандлю Беларусі ў гэтым годзе разам з экспартам нафтапрадуктаў з расейскай нафты.

Па дадзеных Белстата, Беларусь у студзені-траўні 2012 года імпартавала з Расеі 5 млн 442,8 тыс. тон нафтапрадуктаў, што ў 3,7 разы больш у параўнанні са студзенем-траўнем мінулага года.

Імпарт нафты ў справаздачным перыядзе вырас на 42,4% - да 9 млн 179,2 млн тон.

Расейская нафта (прамагонны бензін) з'яўляецца асновай для вытворчасці беларускіх растваральнікаў.

Гэта празрыстая вадкасць, якая атрымліваецца непасрэдна пры дыстыляцыі сырой нафты. Нафта выкарыстоўваецца перш за ўсё ў якасці сыравіны для нафтахімічнай прамысловасці, пры вытворчасці алефінаў у паравых крэкінг-устаноўках. Яна таксама выкарыстоўваецца для вытворчасці бензіну, як у якасці дабаўкі, так і ў якасці сыравіны для спецыяльных перапрацоўчых установак (рэформінг-установак), якія выпрацоўваюць высокаактанавыя дадаткі.

Як паведамляў сайт charter97.org, кантрабандай перапрацаванай расейскай нафты займаюцца беларускія алігархі, блізкія да Лукашэнкі. Пры гэтым яны ўхіляюцца ад платы пошліны ў расейскі бюджэт.

У прыватнасці, кампанія блізкага да Юрыя Чыжа наваполацкага бізнэсмена Мікалая Вераб'я «Інтэрсэрвіс» атрымлівае нафтапрадукты ад «дачкі» расейскай НК «Татнафта» - «Татбелнафтапрадукт». Затым дызель экспартуецца ў краіны Балтыі пад выглядам растваральніка маркі Т і маркі L, а мазут М100 - як антыкаразійная сумесь.

Фота: РІА Новости