Пад Петрыкавым загарэлася былая ваенная частка

Двое рабочых пацярпелі пры пажары на самавольнай вытворчасці ў Петрыкаўскім раёне.

Падчас узгарання на самавольнай вытворчасці ў Петрыкаўскім раёне апёкі 1-2-й ступені атрымалі двое рабочых 1953 і 1982 гадоў нараджэння, паведаміў карэспандэнту БелТА прэс-сакратар Гомельскага абласнога ўпраўлення МНС Руслан Габрылёў.

Інцыдэнт адбыўся на тэрыторыі былой вайсковай часткі каля вёскі Муляраўка. Па прыбыцці да месца выкліку ратавальнікі выявілі, што гарэнне адбываецца ўнутры вытворчага цэха па перапрацоўцы бітумных адходаў. Як высветлілася, падчас залівання растваральніка ў ёмістасць з расплаўленым бітумам адбылося ўзгаранне. У выніку апёкі 1-2-й ступені твару, цела, рук і ног атрымалі двое рабочых. Яны шпіталізаваныя ў раённую бальніцу. Паводле папярэдняй версіі, прычынай узгарання стала парушэнне тэхналагічнага працэсу.

Пры высвятленні абставінаў надзвычайнага здарэння было ўстаноўлена, што гэтым летам прыватная фірма перапрафілявала складскі будынак, які быў у яе распараджэнні, пад вытворчы, размясціўшы ў ім цэх па перапрацоўцы бітумных адходаў. Паводле папярэдняй інфармацыі, дадзеныя змены не былі ўзгодненыя з адпаведнымі службамі. У цяперашні час правяраецца, наколькі правамерным было адкрыццё пажаранебяспечнай вытворчасці на тэрыторыі былога ваеннага гарадка.