У цягніку Брэст-Магілёў шукалі бомбу

З-за фальшывага паведамлення аб мінаванні цягнік спазніўся больш чым на 2 гадзіны.

Пра гэта паведаміў дзяжурны МНС Беларусі, перадае БелТА.

«Паведамленне аб мінаванні цягніка паступіла ўвечары 20 кастрычніка на мабільны тэлефон дзяўчыне, якая рухалася па маршруце Брэст-Магілёў, ад яе знаёмага. Напалоханая дзяўчына тут жа звярнулася да правадніка, затым інфармацыя была перададзеная ў праваахоўныя органы, каб тыя пераправерылі яе і пры неабходнасці прынялі адпаведныя меры», - адзначыў дзяжурны МНС.

Дзякуючы аператыўным дзеянням супрацоўнікаў міліцыі «жартаўнік» быў знойдзены і затрыманы. Паведамленне аб мінаванні апынулася ілжывым. З-за гэтага здарэння цягнік прыбыў на канчатковую станцыю са спазненнем у 2 гадзіны 17 хвілін.