«Калі права ператвараецца ў бяспраўе, супраціў становіцца абавязкам»

Фільм «Жыве Беларусь!» Атрымаў гран-пры на аўстрыйскім кінафестывалі GAFFA.

Беларуска-польская стужка рэжысёра Кшыштафа Лукашэвіча ўганараваная галоўным прызам - «Снежнай куляй» і прызам глядацкіх сімпатый. Фестываль GAFFA прайшоў у Вене з 3 па 5 кастрычніка ў вядомым кінакомплексе Urania, паведамляе «Радыё Свабода».

Свой выбар журы абгрунтавала наступным чынам: «Нам вельмі спадабаўся рэалізм гэтага фільма. Карціна пакідае адкрытымі пытанні, якія стымулююць думкі. Такім чынам, гэта не толькі лепшы фільм, але і найбольш інфарматыўны. Яго дакументальны характар рэтушаваны. Нам асабліва спадабалася вялікае хваляванне, якое ён стварыў падчас прагляду. Фільм прадуманы і пабудаваны ў храналагічным парадку. Ён хоча паказаць не толькі праблемы ў Беларусі, але і ўзнікненне пратэстных плыняў. Уражвае гульня акцёраў. Кінематаграфія, мантаж і гук без дакорны. Фільм, пра які немагчыма сказаць нешта адмоўнае. Людзі павінны яго ўбачыць».

Напярэдадні кінафестывалю рэкламныя аб'явы пра фільм «Жыве Беларусь!» з'явіліся ў аўстрыйскіх СМІ, а таксама кропках раздачы рэкламнай прадукцыі. Арганізатары вырабілі паштоўкі да яго з цытатай Гётэ: «Калі права ператвараецца ў бяспраўе, супраціў становіцца абавязкам!»

Кінафестываль GAFFA - адзіны кінафестываль у Аўстрыі, арыентаваны на моладзь. Паводле афіцыйнага сайту, у гэтым годзе ў конкурсе былі прадстаўлены фільмы з Францыі, Японіі, ЗША, Інданэзіі, Канады і Польшчы, разнастайныя па жанрах, тэматычнай скіраванасці і стылявым дамінантам.

Раней фільм «Жыве Беларусь!» быў узнагароджаны на кінафэстах у Стамбуле, Брусэлі, Гдыні і Варшаве.