Барыс Батура: «Я нікуды не пайшоў на працу»
120- 11.11.2013, 13:58
- 161,287
У панядзелак былы кіраўнік Менскай вобласці гуляў па сталіцы, а ў аўторак збіраецца заняцца здароўем.
Разнос, звальненне і «высылка» на ААТ «Барысаўдрэў» Барыса Батуры стала вынікам пятнічнага візіту Лукашэнкі на шматпакутнае дзіця беларускай мадэрнізацыі. Дапамагаць у нялёгкай справе выканання даручэнняў кіраўніка на «Барысаўдрэў» з гарачкі адправілі і ўжо былога старшыню канцэрна «Беллеспаперапрам» Аляксандра Пераяслаўцава, нагадвае «Салiдарнасць».
Ні адзін, ні другі, насуперак грозным указанням Лукашэнкі, на новым працоўным месцы ў панядзелак не з'явіліся.
«З панядзелка Аляксандр Пераяслаўцаў у нас не працуе, - паведамілі ў прыёмнай канцэрна «Беллеспаперапрам». - Нам паведамілі, што на выходных, указам зверху ён быў прызначаны дырэктарам барысаўскага будтрэста №21».
Таксама ў прыёмнай паведамілі, што выконваючым абавязкі старшыні канцэрна прызначаны Зміцер Лізура, у мінулым першы намеснік старшыні канцэрна.
На ААТ «Барысаўдрэў» новае начальства ў вочы не бачылі.
«Яшчэ пакуль няма, але чакаем», - паведамілі ў прыёмнай ААТ «Барысаўдрэў», але тут жа асекліся і параілі ўдакладніць дэталі ў намесніка па ідэалогіі.
Тэлефон ідэолага маўчаў. Нічога не чулі пра прызначэнне Барыса Батуры новым дырэктарам і ў бухгалтэрыі.
«Да нас перамены пакуль не дакаціліся, - адзначылі суразмоўцы. - І нядзіўна, пра нас успамінаюць бліжэй да зарплаты».
У аддзеле кадраў апынуліся больш катэгарычнымі. «Якое новае кіраўніцтва, вы што, тэлевізар не глядзіце?» - адрэзала субяседніца. Пачуўшы, што тэлевізар журналісты глядзяць і па ім у пятніцу Лукашэнка голасна заявіў пра тое, што новым дырэктарам «Барысаўдрэва» будзе Барыс Батура, работнік аддзела кадраў паведаміла, што глядзім мы не тыя перадачы.
«У нядзелю трэба было глядзець, а не ў пятніцу», - заявілі на тым канцы провада, пасля чаго без тлумачэнняў у аддзеле кадраў кінулі слухаўку. Паўторны званок ўсё ж дазволіў высветліць, што насуперак словам кіраўніка дзяржавы прадпрыемствам кіруе ранейшы дырэктар Уладзімір Мальцаў.
Па выніках візіту на «Барысаўдрэў» Лукашэнка выдаў указ. Праўда, у ім не было ні радка аб прызначэнні Барыса Батуры на новае працоўнае месца, толькі аб вызваленні ад пасады старшыні Менаблвыканкама, піша «Комсомольская правда в Беларуси».
- Куды вы сёння пайшлі на працу? - пацікавіліся мы ў панядзелак у Барыса Васільевіча.
- Я нікуды не пайшоў на працу.
- Дзе знаходзіцеся зараз?
- Па горадзе гуляю.
- Па Менску?
- Так.
- У пятніцу мы чулі пра тое, што вы павінны ісці на завод. Але ва ўказе прэзідэнта пра гэта не прачыталі. Гэта яшчэ не вызначана?
- Што не вызначана ? Мяне звольнілі і ўсё. За невыкананне даручэнняў. Усё зразумела.
- Атрымліваецца, на пенсіі будзеце?
- Так. Буду на пенсіі. З заўтрашняга дня буду кропельніцы прымаць.
- Да ўрачоў ходзіце?
- Так. Не буду я шукаць працу. Усё нармальна, так можаце і напісаць. Усе заслужана. Не трэба з гэтага ствараць праблему. Трэба было так, як мае быць, рабіць - і ўсё.
Фота: ctv.by