Намесніка генпракурора Беларусі звольнілі за закрыццё гучнай справы
40- 14.11.2013, 21:22
- 81,046
Лукашэнка пракамэнтаваў сітуацыю вакол звальнення намесніка генеральнага пракурора Аляксандра Архіпава.
Пра гэта сёння ішла размова на сустрэчы правадыра з генеральным пракурорам Аляксандрам Канюком, паведамляе прэс-служба Лукашэнкі.
Лукашэнка запатрабаваў адрапартаваць аб канкрэтных крымінальных справах, у тым ліку карупцыйных, якія маюць грамадскае гучанне і знаходзяцца ў яго на кантролі. "Пасля таго як нам давялося адмовіцца ад паслуг вашага намесніка Архіпава, гэта мяне пачынае насцярожваць. Можа, у нас сапраўды ў праваахоўных органах асобныя людзі займаюцца не тым, чым трэба. Недапушчальна, калі мы адмаўляем у даверы намесніку генеральнага пракурора, звальняем яго. Гэта ненармальна", - заявіў Аляксандр Лукашэнка.
"Сябрукі там яго уцягнулі ў гэтую авантуру, чалавека забілі, п'яны кіроўца. Не важна, якія ў іх там былі стасункі, але чалавек загінуў. Уявіце, як рэагуе на гэта сям'я. З дапамогай улады гэтую справу замялі. Што падумаюць людзі, навакольныя, сям'я? Падумаюць, што ў нас улады няма? Дзе справядлівасць? Таму пракантралюйце, якія робяцца захады", - сказаў ён.
Раней афіцыйна пра звальненне намесніка генеральнага пракурора Аляксандра Архіпава нідзе не паведамлялася, але ягонае імя знікла з раздзелу "Кіраўніцтва" на сайце Генпракуратуры.
Дзяржаўны радца юстыцыі 3 класа Аляксандр Архіпаў быў прызначаны на пасаду намесніка генпракурора блізу года таму, пасля таго як сваёй пасады пазбавіўся Віктар Конан, які апекаваўся адным з ключавых кірункаў - барацьбой з карупцыяй. Паводле няспраўджанай інфармацыі, Архіпаў апекаваўся наглядам за следствам. На мінулым тыдні ён павінен быў праводзіць прыйманне грамадзян у Барысаве.
У 2011 годзе Архіпаў быў уключаны ў спіс дзяржчыноўнікаў, у дачыненні да якіх дзейнічаюць санкцыі Еўразвязу.