10 наймагутных удараў па эканоміцы Беларусі
41- 20.12.2013, 10:21
- 41,270
Галоўныя праблемы, якія вызначалі развіццё эканомікі краіны ў адыходзячым годзе.
Большасць з іх, як сцвярджаюць эксперты, захаваецца і ў новым годзе, піша «Завтра твоей страны».
Інфляцыя
У большасці еўрапейскіх краін кошты зніжаюцца, а Беларусь у Старым свеце ўпэўнена трымае абсалютная лідарства па тэмпе росту спажывецкіх коштаў. Што, натуральна, не можа радаваць насельніцтва краіны.
Па выніках дзевяці месяцаў інфляцыя ў Беларусі была 10%, па выніках дзесяці - ужо 12%. У Еўразвязе гэты паказчык быў 1,9%.
Калійны развод
Выхад «Уралкалію» са складу Беларускай калійнай кампаніі сур'ёзна ўдарыў па аб'ёмах і, галоўнае, па сусветных коштах на гэты прадукт. У Беларусі пацярпелі «Беларуськалій», Беларуская чыгунка, а па сутнасці ўсе, паколькі калій з'яўляецца адным з галоўных экспартных тавараў беларускай эканомікі.
Беларускія ўлады запэўніваюць, што сітуацыя пачынае паляпшацца. Расейскія - лічаць, што рэальны экспарт ніжэй, чым гэта дэкларуецца афіцыйным Менскам. Пакуль салігорскія руднікі часткова прастойваюць: частка супрацоўнікаў адпраўленая ў адпачынкі, частка – пераведзеная на больш нізкія стаўкі.
Нафтавая нястача
Да канца 2013 года яшчэ ёсць час, але, мяркуючы па ўсім, Беларусь наўрад ці атрымае тыя аб'ёмы расейскай нафты, зыходзячы з якіх, быў звярстаны бюджэт 2013 года. Менск можа разлічваць толькі на 20,7 млн. тон замест 23 млн. тон.
Гэта не менш важная праблема, чым калій, паколькі атрыманыя з расейскай нафты нафтапрадукты - гэта экспартны тавар №1 Беларусі. Ён рэалізуецца ў Еўразвязе, Украіне, Манголіі.
Па балансе на 2014 год, які зараз абмяркоўваецца, тыя ж праблемы: Беларусь хоча больш нафты на перапрацоўку, Расея гатовая паставіць менш.
Рэкордныя даўгі
Пяць гадоў таму беларускія ўлады ганарыліся тым, што краіна не жыве ў доўг. Зараз пошук крыніц для пагашэння знешняга дзяржаўнага доўгу - адна з ключавых праблем беларускай эканомікі.
Каля 3 млрд. даляраў, якія выплачваюцца на працягу 2013 года, сталі рэкордам. Але ён будзе пабіты ўжо ў наступным годзе, калі трэба пагасіць 3,2 млрд. даляраў доўгу.
Крэдытны секвестр
Згортванне крэдытных праграм, у тым ліку на падставе рэкамендацый зверху, і прыватнымі банкамі - гэта, можа быць, і добра ў цэлым для цяперашняй беларускай эканомікі. Але з іншага боку - гэта ўдар па марах радавога беларуса купіць кватэру, а беларускага прадпрымальніка - атрымаць грошы на развіццё бізнесу.
Дырэктыўная мадэрнізацыя
Урад, пры гэтым, гатовы не шкадаваць грошай на абвешчаную ў бягучым годзе маштабную праграму мадэрнізацыі беларускай прамысловасці.
Да чаго можа прывесці дырэктыўны падыход да гэтага працэсу, паказвае правал пяцігадовай праграмы тэхпераўзбраення дрэваапрацоўчай галіны. З 9 заводаў праект быў рэалізаваны толькі на адным. Для завяршэння мадэрнізацыі астатніх спатрэбіліся дадатковыя рэсурсы і час, а таксама некалькі дзесяткаў адставак і крымінальных спраў.
Прыватызацыя
Вядома, больш эфектыўна было б прыцягнуць у мадэрнізацыю рэсурсы прыватнага бізнесу. Але пра гэта, падобна, зараз прыйдзецца забыць. Фактычная нацыяналізацыя некалькіх буйных вытворчасцяў («Керамін», «Красны пішчавік», «Абутак-Луч») і падрыхтаваны законапраект аб прыватызацыі, згодна з якім дзяржава атрымлівае кантроль нават у акцыянерных таварыствах, дзе ў яе няма долі, робяць праблемным прыцягненне рэсурсаў прыватных інвестараў.
Рэцэсійны бумеранг
Імклівае скарачэнне долі МАЗа на расейскім рынку, складскія запасы на МТЗ - для Беларусі гэта першыя наступствы рэцэсіі, якая пачынаецца ў эканоміцы Расеі. Традыцыйная і непарушная залежнасць многіх беларускіх вытворцаў і галін ад расейскага рынку, які ўступае ў перыяд спаду, ужо адбіваецца на Беларусі. У 2014 годзе прагназуюць яшчэ больш сур'ёзныя наступствы.
Кадравы голад
Адыходзячы год пацвердзіў яшчэ раз - ва ўладзе існуе рэальная праблема з кадрамі. Чыноўнікаў тасуюць з аднаго месца на іншае (Сямён Шапіра з гродзенскага стаў менскім губернатарам, Валерый Іваноў з крэсла кіраўніка Беларускай калійнай кампаніі перайшоў на кіруючую пасаду ў Белкаапсаюз). Новых асоб і новых ідэй практычна не з'яўляецца.
Геапалітычны аўтсайдэр
У канцы 2013 года Расея ў чарговы раз змяніла прыярытэт у палітыцы на постсавецкай прасторы. Калі раней такім магла лічыцца Беларусь, то цяпер - Украіна. Нездарма беларускі кіраўнік зноў загаварыў пра гатоўнасць дыялогу з Еўразвязам.