Пост гендырэктара менскага «Дынама» прапанаваны Сяргею Паўлюковічу

Новым генеральным дырэктарам менскага «Дынама» можа стаць асістэнт Алега Пратасава.

Як ужо паведамлялася, генеральны дырэктар менскага «Дынама» Ігар Пугач звольнены са сваёй пасады. Яго месца прапанавана заняць Сяргею Паўлюковічу - аднаму з асістэнтаў галоўнага трэнера каманды Алега Пратасава, паведамляе «Прессбол».

Таксама на пасаду спартыўнага дырэктара, вакантную пасля сыходу Сяргея Гурэнкі, можа быць прызначаны Кірыл Савосцікаў - адзін з дынамаўскіх трэнераў. Чакаецца, што гэтыя кадравыя пытанні будуць развязаныя бліжэйшымі днямі.

Апошнім часам праца Ігара Пугача крытыкавалася з боку старшыні назіральнай рады сталічнага клуба алігарха Юрыя Чыжа, які выказваў незадаволенасць селекцыйнай дзейнасцю «Дынама-Менск». Паводле слоў Чыжа, генеральны дырэктар не спраўляўся з ускладзенымі на яго функцыямі, а ўзровень яго працы не адпавядаў амбіцыям і фінансавымх магчымасцям менскага клуба.