Справа «Экамедсервіса»: канфіскаваная апаратура медцэнтра

Супрацоўнікі «Экамедсервіса», затрыманыя ў рамках крымінальнай справы аб смерці пацыенткі, супрацоўнічаюць са следствам.

Пра гэта паведамілі агенцтву «Інтэрфакс-Захад» у панядзелак ва ўпраўленні Следчага камітэта па Менску.

«Затрыманыя актыўна супрацоўнічаюць са следствам, даюць паказанні», - праінфармавалі ва УСК.

Там таксама паведамілі, што ў рамках гэтай крымінальнай справы «прызначаны комплекс судовых экспертыз». «У «Экамедсервісе» і 4-й клінічнай бальніцы следчымі канфіскаваная ўся дакументацыя, якая тычыцца памерлай пацыенткі. Акрамя гэтага, канфіскаваная апаратура, якая ўжывалася пры правядзенні аперацыі», - распавялі ва УСК.

Там таксама адзначылі, што «ўжо гатовае папярэдняе меркаванне экспертаў аб прычынах смерці пацыенткі».

На сёння ва УСК па Менску запрошаныя бацькі загінулай пацыенткі для «дачы паказанняў», праінфармавалі ва ўпраўленні.

Нагадаем, пасля пластычнай аперацыі па карэкцыі формы носа ў сталічным камерцыйным медыцынскім цэнтры «Экамедсэрвіс» 27 сакавіка 23-гадовая Юлія Кубарава не прыйшла ў прытомнасць. Праз чатыры тыдні, не прыходзячы ў прытомнасць, пацыентка, перанакіраваная ў 4-ю гарадскую клінічную бальніцу, памерла.

3 траўня Кастрычніцкім (Менска) раённым аддзелам Следчага камітэта Беларусі распачатая крымінальная справа па прыкметах злачынства, прадугледжанага ч.2 арт.162 КК - неналежнае выкананне прафесійных абавязкаў медыцынскімі работнікамі, што пацягнула па неасцярожнасці смерць пацыента.

Санкцыі гэтага артыкула прадугледжваюць максімальнае пакаранне ў выглядзе пазбаўлення волі тэрмінам да 5 гадоў з пазбаўленнем права займаць пэўныя пасады, або без яго.

Крымінальная справа прынятая да вытворчасці ўпраўленнем Следчага камітэта Беларусі па Менску, праводзяцца адпаведныя судовыя экспертызы. Дакладна ўстаноўлены факт часовай адмовы ад працы апарата штучнай вентыляцыі лёгкіх падчас правядзення аперацыі.

У рамках расследавання крымінальнай справы па факце смерці пацыенткі «Экамедсервіса» Кубаравай затрымана 5 чалавек.