Уладзімір Копаць: Ад зборнай Беларусі можна чакаць усяго

Экспэрты абмяркоўваюць перыпетыі беларускіх матчаў на чэмпіянаце свету.

Сустрэчу са шведамі пракаментаваў «Прессболу» аўтар пераможнай шайбы ў браму шведскай зборнай на Алімпіядзе-2002 легендарны Уладзімір Копаць:

«Што можна адзначыць са стартавых матчаў? Тое, што ёсць каманда. Пачынаючы ад капітана, які кідаецца галавой пад шайбу, што ўсе цудоўна бачылі, заканчваючы астатнімі хлопцамі, якія цалкам аддаюцца барацьбе. Таму і гульня шмат каму падабаецца. Плюс трэба адзначыць фізічную гатоўнасць нашых хакеістаў, якія ў матчы са шведамі ўсе тры перыяды адпрацавалі ў добрым тэмпе.

Калі зборная Беларусі прадоўжыць дэманстраваць такую гульню, ад яе можна чакаць усяго. Галоўнае, што ёсць ахвота і самааддача. Пры іх наяўнасці скараюцца вялікія вяршыні. Перад чэмпіянатам свету ўжо казаў, што дзеянні беларусаў у таварыскіх матчах ўражвалі, таму чакаю, што на дасягнутым хлопцы не спыняцца і прадоўжаць радаваць заўзятараў на «свеце». Прадчуванні пакуль спраўджваюцца. Яшчэ болей перамог пры добрай гульні!»