Джэніфер Лопес раскрытыкавалі за выступ на дне нараджэння дыктатара

Фонд барацьбы за правы чалавека (HRF) асудзіў спявачку Джэніфер Лопес, якая 29 чэрвеня выступіла на дне нараджэння кіраўніка Туркменістана Гурбангулы Бердымухамедава.

У заяве праваабаронцаў сказана, што Джэніфер Лопес, вядома, «можа сама выбіраць, перад якімі дыктатарамі выступаць, зарабляючы сабе на жыццё». Але такія дзеянні, як гаворыцца ў паведамленні, дыскрэдытуюць рэпутацыю спявачкі як актыўнай удзельніцы праграмы Amnesty International па абароне правоў мексіканскіх жанчын, піша Lenta.ru.

Артыстка і яе прадстаўнікі пакуль не пракаментавалі заяву праваабаронцаў.

Выступ Лопес з нагоды 56-годдзя Бердымухамедава прайшоў на беразе Каспійскага мора ў курортнай зоне «Аваза» побач з горадам Туркменбашы. Як удакладняе Agence France-Presse, падчас канцэрта спявачка ў нацыянальным туркменскім касцюме выканала песню «Happy birthday, Mr President» («З Днём нараджэння, містэр прэзідэнт»).

Разам з Лопес для туркменскага дыктатара таксама спявалі Філіп Кіркораў, Саці Казанава, група «Рэфлекс», Ані Лорак і артысты з Турцыі і Лівана.

Гурбангулы Бердымухамедаў, які з'яўляецца адным з нешматлікіх сяброў беларускага кіраўніка, знаходзіцца на пасадзе прэзідэнта Туркменістана з 2007 года. Міжнародныя праваабарончыя арганізацыі называюць рэжым Бердымухамедава адным з самых аўтарытарных, абвінавачваючы туркменскага лідара ў адсутнасці грамадзянскай і палітычнай свабоды.

Туркменскі кіраўнік у гэтым годзе запрасіў Лукашэнку наведаць сярэднеазіяцкую краіну з візітам у любы зручны для яго час. Гэта запрашэнне было прынята. Тэрміны візіту будуць узгодненыя па дыпламатычных каналах.

Фота: AFP