Брэстчане штурмавалі аддзел па прыватызацыі ЖРЭУ

З-за абстаноўкі, якая абвастрылася да мяжы, быў выкліканы спецназ.

5 чэрвеня ў аддзеле прыватызацыі і абмену жылой плошчы Брэсцкага КУП ЖРЭУ здарыўся інцыдэнт. Прыкладна ў 14 гадзін у дзяжурную частку міліцыі паступіла паведамленне пра тое, што ў вышэйназваным аддзеле вялікая навала нервовага народу і абстаноўка блізкая да канфліктнай. На выклік прыбылі супрацоўнікі спецназа палка патрульна-паставой службы, якія зрабілі зачыстку памяшкання і засталіся ў ім да канца працоўнага дня, піша «Вечерний Брест».

Ажыятаж, выкліканы чарговым рашэннем урада аб пераводзе непрыватызаванага жылля ў арэнднае, выліўся ў пратэсты звычайных грамадзян. У мясцовых СМІ ўжо ўзнімалася тэма непадрыхтаванасці спецыялістаў ЖРЭУ да народнага штурму. Як тлумачаць самі работнікі аддзела прыватызацыі, пасля гэтага інцыдэнту прыйшлося экстранна павялічыць штаты супрацоўнікаў, якія займаліся б толькі тымі, хто не паспеў да першай прыватызацыі, а прымаць прыходзіцца да 30 чалавек у дзень.

Нагадаем, ажыятаж падняўся пасля рашэння ўрада краіны вылучыць беларусам год на прыватызацыю жылля. 5 чэрвеня прем’ер-міністр Беларусі Міхаіл Мясніковіч далажыў, што ў цяперашні час маецца вялікая колькасць непрыватызаваных кватэр. У праекце Указа прапанавана, каб на працягу года пасля выхаду гэтага нарматыўнага акта грамадзяне маглі прыватызаваць жыллё, а калі не, то яно пяройдзе ў статус арэнднага. Для прыватызацыі можна будзе, у тым ліку, выкарыстоўваць чэкі «Жыллё».

«Чым дом навей, тым ён даражэй. Напрыклад, у Фрунзенскім раёне Менска прыватызацыя двухпакаёвай кватэры тыпавых спажывецкіх якасцяў будзе каштаваць ад Br 35 млн. у доме 1964 года пабудовы да Br 142 млн. у доме 1994-га года», - адзначыў прэм'ер-міністр.

Пры гэтым як мінімум 10% ад сумы трэба ўнесці адразу, а астатняе можна будзе выплаціць у растэрміноўку на працягу 40 гадоў.