Дуня Міятавіч вітае вызваленне Ірыны Халіп

Прадстаўніца АБСЕ паводле пытанняў свабоды СМІ вітала пастанову суда Партызанскага раёна вызваліць ад крымінальнага пакарання журналістку Ірыну Халіп.

Аб гэтым гаворыцца ў заяве Дуні Міятавіч, якую распаўсюдзіла прэс-служба АБСЕ.

«Я радая, што Ірына Халіп болей не адбывае пакаранне, прызначанае ёй у 2011 годзе. Я сачыла за яе справай з самага пачатку і неаднаразова падымала гэтае пытанне, маючы стасункі з беларускімі ўладамі», - сказала Дуня Міятавіч.

«Я спадзяюся, што гэткае ж пакаранне іншага беларускага журналіста, Анджэя Пачобута, як і Ірына, асуджанага ў 2011 годзе, будзе таксама адменена, і ў дачыненні журналістаў не будзе ўжывацца пераслед ў будучыні», - дадала яна.

Дуня Міятавіч сказала, што ў рамках яе нядаўняга візіту ў Менск ўлады выказалі гатоўнасць актывізаваць дыялог і супрацоўніцтва з яе Бюро паводле жыццёва неабходнага паляпшэння сітуацыі са свабодай сродкаў масавай інфармацыі.

Нагадаем, сёння суд Партызанскага раёна Менска прыняў пастанову вызваліць журналістку Ірыну Халіп ад крымінальнага пакарання па заканчэнні адтэрміноўкі прысуду.

16 траўня 2011 года жонка былога кандыдата ў прэзідэнты Андрэя Саннікава была прысуджаная да двух гадоў пазбаўлення волі з адтэрміноўкай выканання пакарання на два гады.