Пскоўскія ўлады пра АЧС: Цяпер уся Беларусь палае

Вірус АЧС трапіў у Пскоўскую вобласць Расеі разам з кормам, які быў завезены з тэрыторыі Беларусі.

Корм быў закуплены гаспадарамі прыватнай падсобнай гаспадаркі ў в. Сянюціна, заявіў сёння начальнік Упраўлення ветэрынарыі Пскоўскай вобласці Аляксандр Булах, перадае прэс-цэнтр адміністрацыі Пскоўскай вобласці.

«Цяпер уся Беларусь палае. Толькі ў Віцебскім раёне зарэгістравана 55 ачагоў гэтага віруснага захворвання», - падкрэсліў начальнік упраўлення ветэрынарыі. Ён таксама дадаў, што ў сапраўдны момант для кантролю таварапатоку прадуктаў свінагадоўлі, кармоў на дарогах паблізу расейска-беларускай мяжы выстаўленыя дзяжурныя пасты. Невялікія «лясныя» дарогі перакапаныя, каб прадухіліць перамяшчэнне бескантрольнага аўтатранспарту.

Паводле звестак упраўлення ветэрынарыі Пскоўскай вобласці РФ, у мэтах недапушчэння распаўсюджвання афрыканскай чумы свіней на межах першай і другой пагражальных зон створаныя і функцыянуюць кругласутачныя ахоўна-каранцінныя пасты, дэзінфекцыйныя бар'еры.

Нагадаем, 19 ліпеня ў прыватным падворку ў вёсцы Сянюціна Невельскага раёна Пскоўскай вобласці РФ быў выяўлены выпадак захворвання хатняй свінні афрыканскай чумой.