Стаўка на міжбанку ўпала на 16%
26- 26.07.2013, 21:53
- 51,602
Нацбанк Беларусі не вынес імклівага росту ставак на міжбанку і закідаў банкі рублёвай ліквіднасцю.
Толькі ў чацвер рэгулятар укінуў банкам 3 трлн рублёў пад 40% (Сукупная падтрымка банкаў ліквіднасцю за 4 дні гэтага тыдня склала 9 трлн рублёў, паводле стану на раніцу 26 ліпеня дэфіцыт ліквіднасці ў банкаўскай сістэме складаў 2,7 трлн).
У выніку сярэднеўзважаная стаўка АФН па аднадзённых міжбанкаўскіх крэдытах у беларускіх рублях 26 ліпеня ўпала на 15,94 адсоткавых пункта да 45,51% гадавых. Угоды складаліся ў межах 42-50% супраць 58-68% у чацвер.
Ашаламляльныя прагнозы банкаўскіх дылераў, што ўжо не жартам разважалі аб стаўках у 80% гадавых, да ўсеагульнай радасці не апраўдаліся: падзенне ставак на міжбанку дазволіць банкам у гэтыя выхадныя і ў пачатку наступнага тыдня перавесці дух і падкарэктаваць сваю палітыку ў дачыненні да адсоткавых ставак паводле рублёвых дэпазітаў .
Стабілізацыя ставак на рублёвым міжбанку далася Нацбанку няпроста - да вырашэння прыйшлося падключаць «Банк Румаса» (Банк развіцця) з неабмежаванымі рублёвымі рэсурсамі, якому між іншым ўжо не ўпершыню «даводзіцца» дэмпінгаваць на рынку.
Зрэшты, кошт пытання ў дадзеным выпадку нікога не хвалюе ці, дакладней кажучы, не палохае. Бо палітыка падняцця адсоткавых ставак па рублях была рэалізаваная з адной мэтай - спыніць адток рублёвых укладаў у валютныя і збіць попыт насельніцтва на валюту.