Пазыкі да зарплаты даюць пад 1080% гадавых

Інтэрнэт, рэкламныя постары ў вагонах метро сёння так і зазываюць тых, хто мае патрэбу, «перахапіць» да зарплаты пэўную суму.

Умовы, на першы погляд, прывабныя. Ці так гэта на самай справе?

Мяркуйце самі: узяць можна ад 500 тыс. да 3 млн рублёў. Патрэбны толькі пашпарт. Тэрмін - ад 5 да 30 дзён. Заяўку на атрыманне грошай можна аформіць анлайн. Праз 15-30 хвілін па тэлефоне з вамі звяжацца прадстаўнік кампаніі і запросіць ў офіс для падпісання дамовы. А менеджэры некаторых фірмаў, як лекары хуткай дапамогі, прыязджаюць на дом, дзе афармляюць неабходныя паперы і перадаюць абумоўленую суму, піша «Вечерний Минск».

«Мы старанна падыходзім да падбору кліентаў. Пытаемся, ці азнаёміліся яны з умовамі атрымання пазыкі. Задаем удакладняючыя пытанні. Разлічваем суму, якую можам выдаць, якія адсоткі трэба вярнуць. Ахвотных узяць пазыку дастаткова», - распавяла дырэктар ТАА «Зручныя пазыкі» Алена Траскоўская.

Але будзьце гатовыя, што абыдзецца вам гэты атракцыён нечуванай шчодрасці ў капеечку. Стаўка па мікракрэдытах складае 2-3% у дзень. А калі яго своечасова не пагасіць, то налічваецца пеня ў памеры 4-6% за кожны дзень пратэрміноўкі.

А што ж банкі? Чаму яны не займаюцца тэрміновымі мікракрэдытамі? Пра гэта пацікавіліся ў галоўнага спецыяліста ўпраўлення развіцця рознічных прадуктаў «МТБанка» Анастасіі Губарэвіч.

«А чаму вы так вырашылі? Гэта памылковае меркаванне, што заяўка, патрапіўшы ў банк, ходзіць па кабінетах, - распавяла прадстаўнік банка. - У нас свая наладжаная сістэма праверкі, кантролю. 20-30 хвілін - і вам даюць адказ, атрымлівайце грошы. У адрозненне ад банка, у дробных фірмах штодзённая стаўка 3%, у месяц гэта 90%, за год - 1080%. Ну ці не страшныя лічбы? (Цяпер стаўкі па экспрэс-крэдытах у банках вагаюцца ад 40 да 80% гадавых). Чаму людзі пагаджаюцца на такую кабалу? Справа ў тым, што на невялікай суме кліент можа не заўважыць, як дорага абыходзіцца яму пазыка. І мікрафінансавыя арганізацыі на гэтым гуляюць. Іх 2-3% у дзень - страхоўка ад рызык плюс вельмі вялікі прыбытак».