Мясніковіч запатрабаваў ад «Белмедпрэпаратаў» павялічыць экспарт да 70%

Прэм'ер-міністр Беларусі даручыў РУП «Белмедпрэпараты» павялічыць долю экспарту вырабленай прадукцыі ўдвая.

Такую задачу ён паставіў сёння падчас наведвання прадпрыемства, перадае БелТА.

Цяпер прадпрыемства экспартуе прыкладна 32% ад агульнага аб'ёму выпусканай прадукцыі. З улікам наяўных магутнасцяў асноўнай задачай РУП на сёння, па словах генеральнага дырэктара Віктара Залескага, з'яўляецца насычэнне ўласнага рынку. Пры гэтым ставіцца задача павялічыць долю экспарту.

Адказваючы на пытанне прэм'ера, Віктар Залескі адзначыў, што імпартны складнік ў аб'ёме сыравіны і матэрыялаў прадпрыемства складае каля 70%.

«Значыць, вам трэба 70% прадаваць на экспарт», - падкрэсліў кіраўнік урада.

Як адзначыў журналістам гендырэктар РУП «Белмедпрэпараты», дасягнуць павелічэння долі экспарту плануецца за кошт уводу новых вытворчасцяў. Віктар Залескі звярнуў увагу, што прадпрыемства вядзе актыўную інавацыйную дзейнасць, мадэрнізуе існуючыя вытворчасці, рэалізуе шэраг інвестыцыйных праектаў па стварэнні сучасных, вытворчасцяў, якія адпавядаюць патрабаванням належнай вытворчай практыкі (GMP). Наменклатура лекавых сродкаў, якія выпускаюцца РУП, пастаянна абнаўляецца. На сённяшні дзень яна ўключае 369 найменняў лекавых сродкаў розных фармакатэрапеўтычных груп. Сярод іх антыбактэрыйныя прэпараты, у тым ліку процітуберкулёзныя, а таксама проціпухлінныя і процівірусныя сродкі, лекі для лячэння захворванняў сардэчна-сасудзістай сістэмы і многія іншыя.

Больш за 50 найменняў лекавых сродкаў вырабляецца з субстанцый уласнай або айчыннай вытворчасці. Імпартуемыя субстанцыі набываюцца ў вядучых замежных вытворцаў на аснове прамых кантрактаў з папярэднім правядзеннем аўдытаў пастаўшчыкоў.

Фота: БелТА