Курс еўра ў Расеі б'е рэкорды

Курс еўра ў Расеі ўпершыню з 2009 года пераскочыў за адзнаку ў 44 рубля.

Курс еўра 8 жніўня ўздымаўся на «Маскоўскай біржы» да адзнакі 44 рубля, абнавіўшы максімум з 2009 года. У 11.05 курс дасягнуў адзнакі 44,0005 рубля за еўра, але ўжо праз хвіліну еўра адступіў, апынуўшыся ў раёне 43,98 рублёў.

Даляр пры гэтым трымаўся ў раёне 32,91 рублёў, бівалютны кошык - каля ўзроўню 37,9 рубля, паведамляе «Інтэрфакс». Эксперты тлумачаць павышэнне адзінай валюты да рубля невялікім ростам еўра на рынку Forex. Адзіная валюта замацавалася раніцай у чацвер вышэй за адзнаку 1,33 даляра, паблізу максімуму за паўтара месяца.

Знешні негатыў на фоне нізкай рынкавай актыўнасці прывёў рубель да новых мінімумаў. Самы высокі ў бягучым годзе афіцыйны курс еўра да рубля быў зафіксаваны 1 жніўня - тады за адзін еўра давалі 43,78 рублёў. Танней усяго ў гэтым годзе еўра каштаваў 11 студзеня - 39,64 рублёў, піша NEWSru.com.

Самы высокі афіцыйны курс даляра да рубля быў зафіксаваны 9 ліпеня - 33,32 рублёў, а яго мінімум прыйшоўся на 5 лютага - 29,93 рублёў.

Як перадае агенцтва Bloomberg, падтрымаць еўра ў чацвер могуць дадзеныя аб знешнім гандлі Германіі: згодна з кансенсус-прагнозам экспертаў, якія ўдзельнічалі ў апытанні Bloomberg, станоўчае сальда гандлёвага балансу ФРГ склала ў чэрвені 15 млрд еўра, а прафіцыт рахунку бягучых аперацый павялічыўся да 16 млрд еўра. Еўрапейская валюта атрымала падтрымку і з боку меншага, чым чакалася, скарачэння ВУП Італіі ў другім квартале (-2% пры прагнозе -2,2%).

Курс урада, накіраваны на дэвальвацыю рубля дзеля падтрымання эканамічнага росту ў краіне, не змяніўся, адзначаюць аналітыкі Фінам. Пасля аб'явы кіраўніка Мінфіна Антона Сілуанава пра гатоўнасць аслабіць рубель курс нацыянальнай валюты стаў рэзка зніжацца.

Нягледзячы на тое, што меры па паслабленні курсу рубля былі запланаваныя на пачатак жніўня, ажыятаж продажаў паўстаў ужо ў ліпені, што справакавала рост бівалютнага кошыка. Па выніках ліпеня яго рост склаў 1,7%. З пачатку года курс рубля знізіўся ў адносінах да кошыка валют амаль 9,7%.

У выніку гэтага ЦБ прыйшлося пайсці на зрух верхняй межы валютнага калідора. Зрушэнне адбывалася тры разы па 5 капеек - да 31,85-38,85 рублі. Таксама ў ліпені Банк Расеі павялічыў аб'ём інтэрвенцый, накіраваных на падтрымку рубля. Аб'ём продажу даляраў на ўнутраным рынку склаў 4,18 млрд, што ў 1,5 разы больш, чым у чэрвені. Аб'ём продажаў еўра ў мінулым месяцы таксама вырас у 1,5 разы - да 376,47 млн еўра. Гэта сведчыць пра тое, што ўрад не збіраецца рэзка аслабляць нацыянальную валюту.