Сотні тысяч мусульманаў выйшлі на вуліцы Масквы і Пецярбурга (Відэа)

Расейскія мусульмане святкуюць рэлігійнае свята Ураза-байрам.

Першы і галоўны этап святкавання - агульная малітва - прайшоў без інцыдэнтаў. У небе ў Саборнай мячэці на праспекце Міра баражыраваў верталёт, на подступах дзяжурылі байцы АМАПа. Тое, што адбывалася, нагадала пратэстныя акцыі, але з цікавымі штрыхамі, піша «Коммерсант». Адразу пасля малітвы пачаўся бойкі гандаль, міласціну, шчодрую у дзень свята, даюць «на джыхад», а Уладзімір Пуцін у гэты час віншуе мусульманскую суполку, за ўклад «у падтрыманне міжнацыянальнага міру».

Саборная мячэць Масквы ў дзень свята адкрылася ў 3:30 раніцы, і туды адразу сталі прыходзіць людзі. Каб памаліцца ўнутры будынка, трэба было «трымаць месца» да пачатку намаза. Большасць вернікаў маліліся на вуліцы.

Па разліках паліцыі, толькі ў Маскве святкаваць Ураза-байрам выйшлі больш за 170 тысяч чалавек. Пры гэтым афіцыйных пляцовак для святкавання ў сталіцы ўсяго пяць. У святочных мерапрыемствах у Санкт-Пецярбургу, па дадзеных гарадскога МУС, павінна прыняць удзел да 100 тысяч чалавек, перадае BBC.

Адным з цэнтраў прыцягнення стаў рынак Апраксін двор, на якім з пачатку года неаднаразова праходзілі аблавы на мусульманаў.

Праход людзей да маскоўскай Саборнай мячэці ўдалося арганізаваць без цяжкасцяў - металашукальнікаў было дастаткова, а пашпарты, насуперак перасцярогам маскоўскіх уладаў, не правяралі. Цісканіна ўтварылася ўжо пасля малітвы на станцыі метро «Праспект Міра», дзе вернікі запоўнілі абедзве платформы і пераход, перадае РІА «Новости».

Радавыя мінакі на маскоўскіх вуліцах часта рэагавалі на тое, што адбываецца, з непрыхаваным раздражненнем.

«Некаторыя не разумеюць, што адбываецца. Для многіх, якія тут апынуліся, тое, што адбываецца - гэта некаторы сюрпрыз. А іншыя звяртаюцца з пытаннем пра тое, што ж тут здарылася, да паліцыянтаў. Атрымліваюць нейкія адпаведныя адказы», - паведамляюць відавочцы.

Ураза-байрам - святкуецца ў гонар завяршэння паста ў месяц Рамадан па мусульманскім календары.