«Коммерсант»: Купіць долю Керымава можа Ротэнберг

Інвестары з натхненнем успрынялі навіну аб магчымым продажы долі Сулеймана Керымава ва «Уралкаліі».

Акцыі кампаніі, якія патаннелі з ліпеня, учора ўзляцелі амаль на 10%. Здзелка да гэтага часу не пацверджаная, ужо названыя патэнцыйныя пакупнікі ад яе адхрышчваюцца. Але расейскаму выданню «Коммерсант» стала вядома імя яшчэ аднаго прэтэндэнта - гэта Аркадзь Ротэнберг, які працуе на хімічным рынку з 2011 года. Ускладніць перамовы можа тое, што, па дадзеных «Коммерсанта», Сулейман Керымаў гатовы прадаць свой пакет толькі на траціну даражэй рынкавага кошту.

Учора каціроўкі акцый найбуйнейшага сусветнага вытворцы калію «Уралкалію» на ММВБ выраслі на 8,7%. На Лонданскай фондавай біржы кошт падняўся яшчэ мацней - амаль на 10%. Гэта першы сур'ёзны рост «Уралкалію» з 30 ліпеня, калі аб'ява аб скасаванні партнёрства з «Беларуськаліем» абваліла яго акцыі амаль на 20%. У мінулую пятніцу захоўвалася зніжэнне на 14%. Учора ж «Уралкалій» каштаваў толькі на 5,5 % менш, чым да скандальнай аб'явы. Крыніцы «Коммерсанта» на рынку звязваюць гэта з чуткамі аб продажы долі асноўным акцыянерам «Уралкалію» Сулейманам Керымавым (валодае 21,75 %).

Паводле неафіцыйных версій, перамовы аб продажы пакета вядуцца з пецярбургскім банкірам Уладзімірам Коганам, а таксама з уладальнікам АФК «Сістэма» Уладзімірам Еўтушэнкавым і ўладальнікам «Русснефть» Міхаілам Гуцарыевым. Аднак спадар Еўтушэнкаў учора афіцыйна абверг цікавасць да «Уралкалію». У спадара Когана, па дадзеных крыніц «Коммерсанта», «пакуль няма сродкаў на здзелку і адабрэння звыш».

«Коммерсанту» удалося высветліць імя яшчэ аднаго прэтэндэнта - крыніцы, знаёмыя з сітуацыяй вакол кампаніі, запэўніваюць, што найбольш верагодным пакупніком акцый «Уралкалію» з'яўляецца Аркадзь Ротэнберг. У бізнесмена ўжо ёсць росашанскія «Мінугнаенні» (буйны вытворца азотных і складаных угнаенняў). Структуры, блізкія да Аркадзя Ротэнберга, набылі 79,59% акцый «Мінугнаенняў» у пачатку жніўня 2011 года за $1,4 млрд. Крыніцы «Коммерсанта» кажуць, што «перамовы спадароў Керымава і Ротэнберга знаходзяцца ў вельмі актыўнай стадыі», але калі можа быць зачыненая здзелка, не ўдакладняюць. Прадстаўнік Аркадзя Ротэнберга сітуацыю не каментуе.

Спадар Ротэнберг як пакупнік падабаецца ўладам, паколькі ён «правераны і надзейны», кажуць суразмоўцы «Коммерсанта». «Праблем, як з Сулейманам Керымавым, у гэтым выпадку чакаць не варта», - тлумачыць адзін з іх. Паводле яго слоў, Аляксандр Лукашэнка даў зразумець, што супрацоўнічаць з «Уралкаліем» пры спадары Керымаве не будзе, а Аркадзь Ротэнберг «усіх задавальняе».

Прадпрымальнік не раз абяцаў пашырыць хімічны бізнес. У сакавіку 2012 года яго Нацыянальная хімічная група (НХГ) дамовілася з «Газпрамам» і ўладамі аб рэалізацыі праектаў развіцця газахімічных вытворчасцяў на Далёкім Усходзе. Гаворка ішла пра будаўніцтва буйнога камбіната па вытворчасці азотных угнаенняў у Хабараўскам краі ці Прымор'і. Тады ж НХГ накіравала «Газпраму» запыт на закупку газу ў аб'ёме каля 3 млрд кубаметраў у год. Але праект да гэтага часу ў стадыі распрацоўкі. Крыніцы «Коммерсанта» не раз казалі пра цікавасць спадара Ротэнберга да «Тальяцціазоту» Уладзіміра Махлая.

Але перамовы з любым з прэтэндэнтаў на «Уралкалій» могуць ускладніцца тым, што Сулейман Керымаў гатовы прадаць долю толькі істотна даражэй рынкавага кошту. Па словах крыніц «Коммерсанта», ён просіць за 21,75 % акцый «Уралкалію» каля $4,5 млрд. (учора на ММВБ гэты пакет каштаваў толькі $3,4 млрд). Адзін з суразмоўцаў «Коммерсанта» мяркуе, што прафінансаваць здзелку могуць ВТБ і ВЭБ, але крыніца ў ВТБ гэта абвяргае. У «Нафта Масква» Сулеймана Керымава па-ранейшаму абвяргаюць продаж яго пакета ва «Уралкаліі».

Канстанцін Юмінаў з Raiffeisenbank упэўнены, што «Уралкалій», які генераруе больш за 50% рэнтабельнасці па EBITDA, «цікавы любому, у каго знойдуцца грошы». Да таго ж калі ў кампаніі зменіцца акцыянер, «усё можа вярнуцца ў сваё рэчышча» - напрыклад, кампанія вернецца да супрацоўніцтва з беларускім вытворцам або да стратэгіі «высокі кошт важней аб'ёмаў». Спадар Юмінаў лічыць Аркадзя Ротэнберга «лагічным» прэтэндэнтам і не сумняваецца, што ён зможа знайсці фінансаванне для здзелкі. Аднак для самой кампаніі могуць узнікнуць рызыкі - калі пазыка будзе павешаная на «Уралкалій» ці будзе вырашана для выплаты доўгу нарасціць дывідэнды.

Фота: Дзмітрый Духанін/Коммерсантъ