Валошын: Пра супрацоўніцтва з «Беларуськаліем» гаворка не ідзе

Старшыня савета дырэктараў «Уралкалію» заявіў, што гаворка пра супрацоўніцтва з «Беларуськаліем» не ідзе.

Сёння падчас анлайн-канферэнцыі з топ-мэнэджмэнтам «Уралкалію», на якой гаворка ішла пра фінансавыя паказчыкі па МСФС за першыя 6 месяцаў 2013 года і прэзентацыю абноўленай стратэгіі, інвестары пацікавіліся ў Аляксандра Валошына лёсам арыштаванага гендырэктара «Уралкалію» Уладзіслава Баўмгертнера і перспектывамі супрацоўніцтва з беларускім бокам.

Канферэнцыю праслухаў сайт charter97.org. Прыводзім вытрымкі, якія тычацца Беларусі:

Пытанне: На мінулым тыдні вы сказалі, што ёсць нейкая магчымасць вярнуцца да супрацоўніцтва з «Беларуськаліем», аднак гендырэктар «Уралкалію» застаецца ў зняволенні. Што вы мелі на ўвазе? Ці можа «Уралкалій» зблізіцца з «Беларуськаліем »?

Валошын: Пытанне інфармагенцтва гучала так: «Ці дапускаю я, што калісьці можа быць ...» Мой адказ быў такі: «У жыцці ніколі не кажы ніколі». Тэарэтычна магчыма ўсё, але практычна гаворкі зараз пра гэта не ідзе.

З нагоды магчымага продажу Сулейманам Керымавым свайго пакета акцый, топ-мэнэджэры «Уралкалію» заявілі, што не каментуюць чуткі. «У нас няма ніякай інфармацыі аб змене акцыянераў», - заявіў дырэктар па эканоміцы і фінансах «Уралкалію» Віктар Белякоў.

Новая стратэгія «Уралкалію» мяркуе павелічэнне аб'ёму продажаў за кошт зніжэння коштаў на рынку. На думку топ-мэнэджэраў кампаніі, «Уралкалій» гатовы адабраць частку рынка ў тых гульцоў, хто апынецца больш слабым.

Фота: Коммерсант