Пакупкі за наяўныя грошы абыдуцца даражэй?
10- 28.10.2014, 15:14
- 19,163
Банкам параілі павялічыць кошт інкасацыі папяровых грошай
Сэнс рэкамендацыі Нацбанка просты: зрабіць так, каб крамам было больш выгадна прымаць у пакупнікоў аплату карткай, а не наяўнымі. Крама ў кожным выпадку плаціць банкам. Купіў пакупнік хлеб і малако за гатоўку - крама вінная банку за перавозку і захоўванне выручкі (у касе яе захоўваць нельга). Хочаце заплаціць за прадукты карткай - крама вінная банку за ўстаноўку тэрмінала і яго абслугоўванне. Дарэчы, адна такая разумная машына каштуе каля 5 - 10 млн рублёў, піша «Комсомольская правда в Беларуси».
Раней за разлік па картцы банк браў з крамы ад 0,3 да 3%, а за інкасацыю - у сярэднім 0,25% ад агульнага памеру выручкі. Але ў канцы верасня Нацбанк выпусціў пастанову, у якой парэкамендаваў банкам павялічыць для крамаў тарыфы на інкасацыю і знізіць на эквайрынг (так называецца абслугоўванне пластыкавых картак). Прасцей кажучы, цяпер плацяжы гатоўкай будуць абыходзіцца крамам значна даражэй. За інкасацыю, а таксама здачу грошай у касу банкам раяць браць не менш за 1% ад агульнай сумы, а за абслугоўванне безнаяўных разлікаў - не менш за 0,8%.
У Нацбанку такую пастанову тлумачаць проста: да канца наступнага года палова ўсіх плацяжоў у краіне павінна быць безнаяўнаю, а цяпер іх доля складае ўсяго 19,9%. Аднак, паводле папярэдніх падлікаў спецыялістаў з Мінгандлю, у наступным годзе крамам і грамхарчу праз гэта давядзецца заплаціць банкам на 2 трыльёны рублёў больш (187 мільёнаў даляраў па цяперашнім курсе).
- Гэта абсалютна непад'ёмная лічба, яна складае больш за палову наяўнай рэнтабельнасці, якая ў нашых крам і так ніжэй за плінтус. Гэта афіцыйна стратная праца, якая доўга працягвацца не зможа: крамам прыйдзецца альбо закрывацца, альбо падымаць кошты, - абураецца Віктар Маргелаў, сустаршыня Рэспубліканскай канфедэрацыі прадпрымальніцтва. - Каб кампенсаваць гэтыя выдаткі, буйным крамам прыйдзецца павялічыць кошты прыблізна на 5%, а дробным - да 10%. І калі буйныя сеткі яшчэ змогуць пратрымацца, то маленькія крамы могуць пачаць масава зачыняцца. А гэта можа прывесці да манапалізацыі гандлю.
Нагадаем, паводле падлікаў чыноўнікаў, у наступным годзе інфляцыя не павінна скласці больш за 12%. Але калі крамам праз тарыфы прыйдзецца падняць кошты на 5 - 10%, у гэты прагноз мы ніяк не ўкладземся. На мінулым тыдні гэтую праблему абмяркоўвалі і ў Мінгандлі, і ва ўрадзе, але ніякіх зменаў у пастанову так і не ўнеслі.