Парашэнка анансаваў новыя прызначэнні замежнікаў

Прэзідэнт Украіны Пётр Парашэнка канстатуе "каласальны дэфіцыт" прафесійных патрыятычных кваліфікаваных кадраў.

Пра гэта ён заявіў, адкрываючы пасяджэнне Нацыянальнага савета рэформаў, паведамляе ЛІГАБізнесІнформ.

"У нас цяпер адчуваецца каласальны дэфіцыт прафесійных патрыятычных кваліфікаваных кадраў. І я ўпэўнены, што мы вымушаныя пакуль, на жаль, пакрываць гэты дэфіцыт за кошт так званага крытычнага імпарту, у тым ліку з-за мяжы", - сказаў ён.

Паводле слоў Пятра Парашэнкі, у рамках рэформы дзяржслужбы неабходна пачаць падрыхтоўку ўласнага кадравага рэзерву з еўрапейскай адукацыяй і веданнем замежных моў. На думку прэзідэнта, такая "кадравая вытворчасць" у бліжэйшы час можа быць запушчаная.

"Хоць гэта не азначае, што мы завяршылі нашую, на маю думку, вельмі эфектыўную і вельмі карысную практыку прызначэння замежнікаў. Некалькі сюрпрызаў я вам яшчэ абяцаю", - дадаў ён.

Нагадаем, 2 снежня Вярхоўная Рада зацвердзіла склад новага ўрада, у тым ліку міністэрскія пасады атрымалі трое замежнікаў - Наталля Ярэська (міністр фінансаў), Аляксандр Квіташвілі (міністр аховы здароўя) і Айварас Абрамавічус (міністр эканамічнага развіцця і гандлю). У той жа дзень прэзідэнт Парашэнка даў ім грамадзянства Украіны.

Фота: AFP