Беларускія каталікі будуць маліцца аб міру ва Украіне

Каталікі Беларусі 23 лютага будуць маліцца аб мірным развязванні канфлікту ва Украіне.

Біскупы звярнуліся з прапановай да ўсіх беларускіх каталікоў, каб нядзеля (23 лютага) стала Днём малітвы і посту ў інтэнцыі Украіны, піша БелТА.

У звароце беларускіх каталіцкіх біскупаў, размешчаным на сайце Рымска-каталіцкай царквы ў Беларусі, гаворыцца: «З вялікім непакоем мы сочым за тым, што адбываецца ў апошні час ва Украіне. Дадзеная сітуацыя з'яўляецца для нас заклікам да малітоўнай салідарнасці ў інтэнцыі мірнага развязвання гэтага драматычнага канфлікту. Папа Францыск заклікаў да мірнага заканчэння канфлікту ва Украіне, запэўніўшы ў сваёй блізкасці да ўкраінскага народу і малітве аб ахвярах гвалту, іх сямейніках і параненых».

Біскупы звярнуліся з прапановай да ўсіх беларускіх каталікоў, каб нядзеля (23 лютага) стала Днём малітвы і посту ў інтэнцыі Украіны: «заахвочваць, каб у гэты дзень ва ўсіх храмах і капліцах нашай краіны падчас святой імшы і эўхарыстычных набажэнстваў узносілася малітва за Украіну, каб усе стораны спынілі любыя акты гвалту і шукалі згоды і міру. Міласэрнаму Богу давяраем ўсіх ахвяр гэтага канфлікту, а сем'ям загінулых запэўніваем ў малітоўнай памяці, выказваючы ім словы сардэчнай спагады».