Зміцер Дашкевіч арыштаваны на 25 сутак

(абноўлена - 14:40) Палітык будзе знаходзіцца за кратамі амаль да заканчэння ЧС па хакеі ў Менску.

Былога палітвязня затрымалі ўчора ўвечары каля яго дома. Яго абвінавацілі ў непадпарадкаванні супрацоўнікам міліцыі. Падчас працэсу, які адбыўся сёння ў судзе Першамайскага раёна, Зміцер Дашкевіч заявіў, што гэта хлусня, перадае «Радыё Свабода».

«Няма чаго каментаваць, нейкі абсурд. Звязана з магчымай актыўнасцю «Маладога фронту» перад Чарнобыльскім шляхам і Чэмпіянатам свету па хакеі», - заявіў палітык пасля таго, як суддзя Юрый Гарбатоўскі абвясціў аб сваім рашэнні.

22 красавіка таксама ля свайго дома быў затрыманы каардынатар грамадзянскай кампаніі «Еўрапейская Беларусь» Максім Вінярскі. Яго асудзілі на 12 сутак адміністрацыйнага арышту. Максім Вінярскі абвясціў сухую галадоўку пратэсту. Ён таксама заявіў, што звязвае свой ​​арышт з маючым адбыцца ЧС.

Нагадаем, 28 жніўня 2013 года Зміцер Дашкевіч выйшаў на волю з гродзенскай турмы №1 пасля амаль трохгадовага зняволення. Яго арыштавалі напярэдадні апошніх прэзідэнцкіх выбараў, 18 снежня 2010 года, і асудзілі спачатку за «асабліва злоснае хуліганства», а затым - за «злоснае непадпарадкаванне патрабаванням адміністрацыі папраўчай установы».

За Змітром Дашкевічам устанавілі прэвентыўны нагляд, тэрмін якога павінен скончыцца 28 траўня.