Змоўшчыкаў Піліпца вызвалілі па амністыі

Спыненая крымінальная справа ў дачыненні да трох гомельскіх чыноўнікаў, якія абвінавачваюцца ў кватэрных афёрах.

Рашэнне аб спыненні справы ў дачыненні да былых супрацоўнікаў УКБ гарвыканкама горада Гомеля Валерыя Барысевіча, Антаніны Зелянок і Алы Нізкоўскай па амністыі прынята на падставе таго, што яны з'яўляюцца пацярпелымі ад катастрофы на Чарнобыльскай АЭС. Пра гэта паведамілі карэспандэнту сайта charter97.org у аддзеле інфармацыі і сувязяў з грамадскасцю Генпракуратуры Беларусі.

- Рашэнне аб вызваленні па амністыі Валерыя Барысевіча, Антаніны Зелянок і Алы Нізкоўскай было прынята адначасова з вынясеннем прысуду Віктару Піліпцу, - удакладнілі ў ведамстве.

Нагадаем, у 2011 годзе службовымі асобамі УКБ Гомельскага гарвыканкама з парушэннем дзеючага заканадаўства былі размеркаваныя 25 кватэр у чатырох жылых дамах, першапачаткова прызначаных для грамадзян, домаўладанні якіх падлягалі зносу ў сувязі з адабраннем зямельных участкаў для дзяржаўных патрэб.

Кватэры былі размеркаваныя сярод работнікаў УКБ, іх сваякоў і знаёмых па коштах у некалькі разоў ніжэй рынкавага кошту жылля. Будаваў гэтыя дамы менавіта УКБ Гомельскага гарвыканкама, у тым ліку з прыцягненнем бюджэтных сродкаў. У верасні 2012 года па гэтай справе быў арыштаваны старшыня Гомельскага гарвыканкама Віктар Піліпец.

Акрамя Піліпца на лаве падсудных апынуліся дырэктар упраўлення капітальнага будаўніцтва Гомеля Ігар Адарчанка, яго намеснік па эканоміцы і фінансах Валерый Барысевіч, начальнік жыллёва-інвестыцыйнага аддзела Антаніна Зелянок і начальнік планава-дамоўнага аддзела Ала Нізкоўскай. Піліпец і Нізкоўская ўтрымліваліся пад вартай у Магілёўскім СІЗА.

У выніку разгляду крымінальнай справы ў судзе 22 красавіка былы кіраўнік гарвыканкама Гомеля і дырэктар упраўлення капітальнага будаўніцтва Гомеля Ігар Адарчанка былі прысуджаныя да турэмнага зняволення тэрмінам на 5 гадоў. У сваім апошнім слове Піліпец заявіў, што пры расследаванні гэтай крымінальнай справы выкарыстоўваліся «жахлівыя і часам забароненыя законам метады». Ён сказаў, што ў ходзе расследавання нават у сведак арыштоўвалася маёмасць, што, на яго думку, з'яўляецца самаўпраўнасцю з боку асобных членаў следчай групы.