Мутко назваў зборную РФ самай панурай камандай свету

Міністр спорту Расеі Віталь Мутко мяркуе, што ў расейскім футболе трэба многае мяняць, інакш рэгрэс прадоўжыцца.

Адной з праблем няўдалага выступу нацыянальнай каманды на чэмпіянаце свету ў Бразіліі ён разгяладае той факт, што ў Расеі не ставяцца да футбола як да свята.

"Мы прыехалі на чэмпіянат свету, але былі там самай пахмурнай камандай. Значыць, у гэтым плане ёсць пэўная праблема. На футбол трэба глядзець інакш і ставіцца да яго як да свята. А пакуль у нас падае наведвальнасць, няма рэйтынгаў у трансляцыях матчаў. Гэта не можа нас задаволіць. І нам гэта ўсё супольна з заўзятарамі, клубамі, федэрацыяй трэба мяняць", - сказаў Мутко ў эфіры тэлеканала "Расія 24".

Міністр адзначыў, што ў 2008 годзе, калі зборная дайшла да паўфіналу чэмпіянату Еўропы, расейскі футбол выйшаў на правільны шлях развіцця, існаваў баланс паміж інтарэсамі клубаў і нацыянальнай каманды, але сітуацыя змянілася ў горшы бок.

"На жаль, мы пасля гэтага скаціліся назад і прадаўжаем гэта рабіць. Вядома, тут патрэбныя змены. Я перакананы, што правесці ЧС-2018 у Расеі і выступіць паспяхова - гэта сінонімы", - мяркуе Мутко.

Фота: AP