Супраць прапагандыста Кісялёва распачатая крымінальная справа
44- 4.07.2014, 16:57
- 67,694
Яго абвінавачваюць у фінансаванні тэрарызму.
Служба бяспекі Украіны распачала крымінальную справу ў дачыненні да расейскага журналіста Дзмітрыя Кісялёва за фінансаванне тэрарызму на тэрыторыі Украіны.
Пра гэта на брыфінгу заявіў кіраўнік установы Валянцін Налівайчанка.
"Арганізатары і фінансісты тэрарызму ва Украіне сёння не толькі становяцца падазраванымі, у дачыненні да іх, у тым ліку кіраўніка гэтага інфармацыйнага агенцтва праводзіцца расследаванне паводле артыкула фінансаванне тэрарызму, спрыянне тэрарыстычнай дзейнасці", - паведаміў старшыня СБУ, удакладніўшы, што гаворка ідзе пра Кісялёва.
Таксама Служба бяспекі Украіны распачала крымінальную справу ў дачыненні да кіраўніка Памежнай службы РФ Уладзіміра Кулішова.
"Распачата крымінальная справа разам з довадамі і допытамі затрыманых агентаў, у тым ліку, ФСБ. Мы ўсё высвятляем праз следства і будзем ім інкрымінаваць фінансаванне і падтрымку тэрарызму на нашай тэрыторыі, незаконную перавозку зброі для выкарыстання супраць мірнага насельніцтва тэрарыстычнымі арганізацыямі ў Луганскай і Данецкай абласцях", - распавёў В.Налівайчанка.
Ён таксама заявіў, што Украіна будзе звяртацца да міжнародных партнёраў з тым, каб яны спрыялі ў правядзенні допыту згаданай асобы.