Дзярждума дазволіла саджаць за мітынгі на пяць гадоў

Дзярждума прыняла ў трэцім, канчатковым, чытанні закон аб крымінальнай адказнасці за неаднаразовы ўдзел у мітынгах.

Дакумент уводзіць ў КК Расеі артыкул 212.1 (неаднаразовае парушэнне ўсталяванага парадку арганізацыі альбо правядзення збору, мітынгу, дэманстрацыі, шэсця або пікетавання). Справы паводле гэтага артыкула будуць заводзіць супраць грамадзян, якія прыцягваліся да адміністрацыйнай адказнасці за ўдзел у мітынгах больш за два разы за 180 дзён.

Санкцыі паводле артыкула 212.1 прадугледжаныя наступныя: штраф ад 600 тысяч да 1 мільёна рублёў альбо ў суме прыбытку асуджанага за час ад двух да трох гадоў, абавязковыя працы тэрмінам да 480 гадзін, папраўчыя работы тэрмінам ад года да двух, прымусовыя работы тэрмінам да пяці гадоў, пазбаўленне волі тэрмінам да пяці гадоў, піша «Інтэрфакс».

Таксама законам уносіцца шэраг паправак у КоАП. Так, максімальны тэрмін адміністрацыйнага арышту прапануецца павялічыць з 15 да 30 дзён, змяніўшы частку 1 артыкула 3.9 кодэкса.

У артыкул 19.3 КоАП (непадпарадкаванне законнаму патрабаванню супрацоўніка сілавых структур) дадаецца пункт 6, які ўсталёўвае адказнасць за паўторнае непадпарадкаванне паліцэйскаму (пункт 1 артыкула), супрацоўніку ФСБ (пункт 4) або ФСО (пункт 5), пішуць Grani.ru.

Максімальнай санкцыяй паводле гэтага абвінавачвання становіцца арышт тэрмінам да 30 дзён.

Акрамя таго, уводзіцца адміністрацыйны арышт паводле артыкула 20.2 КоАП (парушэнне парадку правядзення масавых мерапрыемстваў), да гэтага часу прадугледжваў толькі штрафы і абавязковыя працы. За арганізацыю пратэстнай акцыі без падачы паведамлення (частка 2) прадугледжаны арышт да 10 дзён, а за правядзенне мітынгу, што перашкодзіць працы інфраструктуры (частка 3), - да 15. Арганізатарам мітынгу, што нанёс шкоду здароўю чалавека (частка 4), пагражае арышт да 20 дзён, а ўдзельнікам (частка 6) - да 15.

Акрамя таго, у артыкул уводзяцца пункт 6.1, які прадугледжвае да 15 дзён арышту для ўдзельнікаў мітынгу, які стварыў перашкоды інфраструктуры, і пункт 8, які прадугледжвае да 30 дзён арышту ў выпадку паўторнага абвінавачвання ў парушэнні правілаў правядзення акцый.

Падобныя змены ўносяцца ў артыкул 20.2.2 КоАП (арганізацыя масавага адначасовага знаходжання або перамяшчэння грамадзян у грамадскіх месцах).

Дадатковыя правы атрымліваюць сілавікі. У частку 2 артыкула 16 закона «Аб паліцыі» ўносяцца карэктывы, якія дазваляюць праваахоўнікам ачапляць і блакаваць аб'екты не толькі для спынення, але таксама і для прафілактыкі масавых беспарадкаў і іншых дзеянняў, багатых негатыўнымі наступствамі.

Нарэшце, пераглядаюцца нормы закона «Аб сходах, мітынгах, дэманстрацыях, шэсцях і пікетаваннях». У прыватнасці, журналістам, якія асвятляюць пратэстныя акцыі, з гэтага часу загадана «мець добра бачны адметны знак прадстаўніка сродкаў масавай інфармацыі».

Аўтары новага закона - адзінаросы Андрэй Сідзякін і Андрэй Красаў, а таксама лідар «Партии пенсионеров за справедливость» Ігар Зотаў, які ўваходзіць у фракцыю «Справедливой России». Дакумент быў зарэгістраваны ў ніжняй палаце 31 сакавіка. 20 траўня ён прайшоў першае, а 1 ліпеня - другое чытанне.

23 чэрвеня стала вядома, што фракцыі КПРФ, ЛДПР і «Справедливой России» не ўнеслі да другога чытання дакумента ні адной папраўкі. «Яго палепшыць нельга - гэта закон таталітарнай паліцэйскай дзяржавы», - растлумачыў начальнік юрыдычнай службы КПРФ дэпутат Вадзім Салаўёў. Намеснік кіраўніка фракцыі справаросаў Міхаіл Емяльянаў, са свайго боку, заўважыў, што ягоная фракцыя не ўдзельнічае ў працы над законапраектам «з прынцыповых меркаванняў», паколькі папраўкі ўносіць «сэнсу няма».

У дзень другога чытання законапраекта шасцёра грамадзянскіх актывістаў правялі ля Дзярждумы няўзгоднены групавы пікет супраць прыняцця дакумента. Пяцёра пікетоўцаў былі затрыманыя; на іх аформілі пратаколы паводле артыкула 20.2 КоАП.