Яраш адмовіўся ад «паходу на Кіеў»
17- 17.08.2014, 20:53
- 31,601
Украінскія ўлады выканалі частку патрабаванняў актывістаў арганізацыі, таму яны застаюцца на фронце.
Лідэр «Правага сектара» Дзмітрый Яраш у афіцыйным відэазвароце заявіў, што актывісты арганізацыі застаюцца на фронце і адмаўляюцца ад намеру ісці на Кіеў, паведамляе Цензор.нет.
Сваю пастанову ён патлумачыў тым, што частка патрабаванняў, выкладзеных ва ультыматуме да прэзідэнта Пятра Парашэнкі, ужо выкананая. «Былі факты затрымання, збіцця і катаванняў нашых хлопцаў, і гэта адбывалася на загад намесніка міністра ўнутраных спраў Еўдакімава. Таму была наша празмерна эмацыянальная заява. На гэты момант нам паведамілі, што ўсе пабрацімы адпушчаныя, а пытанне звальнення Еўдакімава разглядаецца Кабінетам міністраў. Спадзяемся, што пастанова аб ягонай адстаўцы будзе прынятая», - заявіў Яраш. «Разумеем, што гэта цяпер маленькая перамога, таму, улічваючы сітуацыю на фронце, застаемся на сваіх пазіцыях», - паведаміў ён.
Нагадаем, 18 жніўня «Правы сектар» выставіў прэзідэнту Пятру Парашэнку ультыматум: чыстка ў МУС ці байцы ідуць на Кіеў. У выпадку невыканання патрабаванняў цягам 48 гадзін «Правы сектар» гатовы быў абвясціць ўсеагульную мабілізацыю рэзервовых батальёнаў і пачаць паход на Кіеў з мэтай правядзення «хуткіх рэформаў» у МУС.
Кіраўнік МУС Арсен Авакаў з нагоды ультыматуму «Правага сектара» заявіў, што дакумент на адстаўку Еўдакімава два тыдні таму адпраўлены ў Кабмін на галасаванне, а ультыматум - усяго толькі піяр. На думку Авакава, арганізацыя падыгрывае маскоўскай прапагандзе, «палохаючы сваімі тупымі ўчынкамі людзей на ўсходзе».