Reuters: Дачка Пуціна валодае багаццем у мільярды даляраў

Агенцтва Reuters апублікавала расследаванне, з якога вынікае, што дачка Пуціна Кацярына Ціханава валодае багаццем у мільярды даляраў.

Расследаванне было апублікаванае на сайце агенцтва ў аўторак, 10 лістапада, піша «Дождж».

Пасля непацверджанай інфармацыі аб асобе Кацярыны ў СМІ, высокапастаўлены расейскі дзеяч распавёў Reuters, што яе прозвішча - Ціханава.

Старшыня праўлення «Газпромбанка» Андрэй Акімаў, як паведамляе агенцтва, казаў, што ён бачыў Кацярыну, калі яна была дзіцем, і ў апошні час, і што Ціханава - дачка прэзідэнта Расеі Уладзіміра Пуціна.

Паводле звестак Reuters, раней у 2015 годзе 29-гадовая Ціханава назвала сябе жонкай Кірылы Шамалава, сына Мікалая Шамалава, саўладальніка банка «Расія» і Выбаргскага суднабудаўнічага завода і «даўняга сябра прэзідэнта». Паводле ацэнак, якія агенцтву далі фінансавыя аналітыкі, як муж і жонка Шамалаў і Ціханава валодалі б карпаратыўнымі холдынгамі на суму каля двух мільярдаў даляраў - у асноўным гэта акцыі найбуйнейшага ў Расеі нафтахімічнага холдынгу «СІБУР», якія Шамалаў набыў у прадпрымальніка Генадзя Цімчанкі, «іншага даўняга сябра Пуціна».

Акрамя таго, піша Reuters, Шамалаву і Ціханавай належыць прыморская віла ў горадзе Біярыцы на паўднёвым захадзе Францыі, кошт якой ацэньваецца прыкладна ў 3,7 мільёна даляраў. Гэты актыў, паводле звестак агенцтва, Шамалаў таксама набыў у Цімчанкі.

Віла, якую, як сцвярджае Reuters, Шамалаў набыў тры гады таму, уяўляе сабой чатырохпавярховы дом з басейнам, які размяшчаецца на вяршыні марской скалы. Паводле звестак агенцтва, плошча дома, пабудаванага ў 1950-х гадах, складае каля 300 квадратных метраў, плошча саду - каля дзвюх тысяч квадратных метраў.

Агенцтва спасылаецца на публічныя дакументы, згодна з якімі ў верасні 2007 года Цімчанка і ягоная жонка Алена Ермакова зарэгістравалі ў Францыі кампанію SCI Atlantic, каб набыць дом. Паводле звестак агенцтва, 15 лістапада 2012 года акцыі кампаніі, якая ўсё яшчэ валодае вілай, былі перададзеныя Шамалаву. Сума ўгоды невядомая. У той жа час, людзі, якія жывуць паблізу, сказалі Reuters, што Шамалава і Ціханаву яны там не бачылі.

Таксама, піша агенцтва, Ціханава займаецца публічна фундаванымі праектамі ў Маскоўскім дзяржаўным універсітэце. Reuters вывучыла афіцыйныя дакументы і высветліла, што ў рамках гэтых праектаў Ціханава падпісала кантракты на некалькі мільёнаў даляраў з дзяржаўнымі арганізацыямі. Аднак, як адзначае Reuters, няма прыкмет таго, што з гэтай працы Ціханава здабывае асабістую выгаду. Прынамсі, паводле звестак агенцтва, Ціханава дапамагае кіраваць планам у пашырэнні корпуса МДУ на 1,7 мільярда даляраў.

Кацярына Ціханава і Кірыл Шамалаў адмовіліся ад каментароў для артыкула Reuters. Прадстаўнік Цімчанкі, адказваючы на пытанне пра дом у Біярыцы, заявіў, што не будзе даваць каментары ў асабістых пытаннях. Прэс-сакратар прэзідэнта Дзмітрый Пяскоў не змог пацвердзіць «Дажджу» інфармацыю аб тым, што Кацярына Ціханава з'яўляецца дачкой Уладзіміра Пуціна.

Кацярына Ціханава - расейская грамадская дзяячка, намесніца прарэктара МДУ, кіраўніца Цэнтра нацыянальнага інтэлектуальнага рэзерву МДУ і кіраўніца фонду «Иннопрактика», які супольна з універсітэтам рэалізуе маштабны інвестыцыйны праект для стварэння ў Маскве навукова-тэхналагічнай даліны на Вараб'ёвых гарах.