Мінінфармацыі хавае, як збіраецца кантраляваць інтэрнэт

Цяперашняя сітуацыя нагадвае 2014 год, калі дыктатар падпісаў новы закон аб СМІ.

21 красавіка падчас штогадовага «паслання беларускаму народу і нацыянальнаму сходу» Лукашэнка заявіў, што даручыў Міністэрству інфармацыі распрацаваць новы закон у сферы кантролю інтэрнэту.

«Мы хочам, каб інтэрнэт кантраляваўся нейкай міжнароднай арганізацыяй паводле пэўных правілаў. Калі гэтага не будзе, то кожная краіна будзе абараняць свае нацыянальныя інтарэсы самастойна. Цяпер Ананіч і іншыя займаюцца гэтым пытаннем. На стол мне павінны быць пакладзеныя законатворчыя ініцыятывы», - заявіў Лукашэнка.

На наступны ж дзень ГА «Беларуская асацыяцыя журналістаў» афіцыйна звярнулася ў Міністэрства інфармацыі з канкрэтнымі пытаннямі:

- Пра якія заканадаўчыя ініцыятывы канкрэтна ідзе гаворка?

- Якія нормы, што рэгулююць функцыянаванне нацыянальнага сегмента сеткі Інтэрнэт, падлягаюць змене?

16 траўня замест адказу на пастаўленыя канкрэтныя пытанні арганізацыя атрымала паведамленне, што зварот «прыняты да ведама»:

Старшыня ГА «БАЖ» Андрэй Бастунец кажа, што адказ міністэрства не толькі парушае заканадаўства, але і вельмі нагадвае прыняцце паправак у закон «Аб СМІ» ў 2014 годзе.

«У 2014 годзе «Беларуская асацыяцыя журналістаў» таксама звярталася ў шэраг дзяржаўных органаў з пытаннямі аб распрацоўцы змяненняў заканадаўства аб СМІ. Тады мы атрымалі афіцыйны адказ з Міністэрства інфармацыі аб тым, што ў выпадку распрацоўкі такіх зменаў, журналісцкая супольнасць будзе запрошаная да іх абмеркавання.

Але гэтага так і не адбылося, а пра змены мы даведаліся толькі ў дзень іх прыняцця «парламентам». Цяперашняя сітуацыя вельмі нагадвае 2014 год і таксама паказвае, як беларускія міністэрствы адказваюць на канкрэтныя пытанні ў зваротах да іх. Мы не пакінем гэты адказ Мінінфармацыі без увагі і абавязкова яго абскардзім», - кажа Андрэй Бастунец.