Беларусь ператвараецца ў краіну беспрацоўных
153- 24.01.2016, 10:27
- 65,325
Беларусы гатовыя працаваць нават за $50 за месяц.
«Салiдарнасць» пагутарыла з прадстаўнікамі кадравых агенцтваў і даведалася, ці зменіцца сітуацыя на беларускім рынку працы ў гэтым годзе. Атрымалася, што, падобна, у 2016 годзе Беларусь працягне ператварацца ў краіну беспрацоўных.
Паводле слоў дырэктаркі кадравага агенцтва «Калекцыя адкрыццяў» Ірыны Шаткоўскай, колькасць вакансій у 2016 годзе павялічвацца не будзе, а застанецца «дзесьці на ўзроўні 2015 года».
- У той жа час зменіцца склад гэтых вакансій, - распавяла яна. - На рынку працы будуць запатрабаваныя два тыпы спецыялістаў. Па-першае, гэта працаўнікі шырокага профілю, якія могуць замяніць некалькіх чалавек. І тэхнічныя навыкі, і эканамічныя, і камунікатыўныя навыкі. Калі раней для гэтага наймалі трох чалавек, то цяпер хочуць знайсці аднаго.
Таксама, на думку суразмоўніцы, у 2016 годзе будуць шанавацца ўнікальныя спецыялісты:
- Па-другое, будуць запатрабаваныя, напрыклад, вельмі рэдкія тэхнолагі, альбо спецыялісты з адмысловымі ведамі і досведам.
Чакаць росту заробкаў на працягу года беларусам відавочна не варта, лічыць экспэрт:
- Паводле нашых ацэнак ад 5 да 30% зменшыўся заробак у мінулым годзе. І гаворка ідзе пра суму ў рублях! Думаю, у гэтым годзе такая тэндэнцыя можа працягнуцца.
Як прагназуе дырэктарка кадравага агенцтва «Свабодны выбар» Ксенія Барэйша, у 2016 годзе цяжка прыйдзецца нават «белым каўнерыкам».
- Колькасць вакансій можа зменшыцца яшчэ на 10-15%, а можа нават і больш, - кажа яна. - Магчыма, у лізінгавых або IT-кампаніях сітуацыя будзе лепей, але мы працуем з кампаніямі аптовага гандлю і транспарту і бачым, што тут сітуацыя не вельмі добрая.
Паводле слоў суразмоўніцы, людзі цяпер імкнуцца трымацца за любыя працоўныя месцы і нават не думаюць аб добраахвотным сыходзе. І гэта пры тым, што заробкі офісных працоўных таксама сур'ёзна «аселі».
- Заробкі ўпалі, і ніхто нават не чакае, што яны будуць павялічвацца, - адзначае Ксенія Барэйша. - На сёння мінімальныя грошы, за якія людзі згаджаюцца працаваць, - гэта 3-4 мільёны рублёў. Але гэта тычыцца працы з поўнай занятасцю.
Калі казаць пра працу на частку стаўкі, то тут, паводле слоў экспэрта, бывае запатрабаванай нават праца за 50 даляраў на месяц.