Наталля Радзіна: Лукашэнка неадэкватны

Ён не здольны кантраляваць сітуацыю ў эканоміцы.

Пра гэта ў каментары выданню «ГОРДАН» заявіла галоўная рэдактарка сайта charter97.org Наталля Радзіна.

Украіна павінна судзіць пра пазіцыю Беларусі паводле яе ўчынкаў. Галасаванне беларускай дэлегацыі супраць рэзалюцыі аб правах чалавека ў акупаваным Крыме кажа пра тое, што Лукашэнка цалкам падтрымлівае дзеянні Расеі.

«Верце не словам, а дзеянням. Паводзіны беларускай дэлегацыі ў ААН відавочна прадэманстравалі, на чыім баку сёння Лукашэнка ў вайне Расеі супраць Украіны. Абсалютна на баку Уладзіміра Пуціна. Сёння ў тым ліку ён заявіў, што на міжнароднай арэне Беларусь падтрымлівае ўсе дзеянні Расеі», – паведаміла Наталля Радзіна.

На яе думку, 17 лістапада падчас сустрэчы з расейскімі журналістамі Лукашэнка прадэманстраваў «поўную неадэкватнасць».

«Лукашэнка сёння гуляў на інфармацыйнае поле Расеі і Украіны, у тым ліку, бо ў гэтых краінах ён з'яўляецца больш папулярным палітыкам, чым у самой Беларусі. У рэспубліцы яго выступ трансляваўся толькі па радыё. І прамова паказала, што Лукашэнка не ў стане кантраляваць сітуацыю ў эканоміцы. Ён неадэкватна ўспрымае становішча рэчаў і нават не змог сказаць, які сярэдні заробак па краіне, і ў агульным паказаў поўную неадэкватнасць», – заявіла Радзіна.

Яна таксама падкрэсліла, што прызначаная раней сустрэча Пятра Парашэнкі з беларускім правадыром страціла ўсялякі сэнс.

«Я думаю, тое, што адбылося ў ААН яшчэ раз даводзіць, што сустрэча бессэнсоўная. Я не разумею, пра што Парашэнка можа гаварыць з марыянеткай Крамля. Таму што ад Лукашэнкі нічога наогул не залежыць у гэтай сітуацыі», – адзначыла Радзіна.

17 лістапада Лукашэнка правёў сустрэчу з расейскімі журналістамі. «Мы грудзьмі закрываем 1200 кіламетраў мяжы з Украінай, таму што плынню ідзе зброя, выбуховыя рэчывы», – сказаў ён. У дзяржаўнай памежнай службе Украіны зняпраўдзілі гэтую заяву.

10 лістапада Пятро Парашэнка і Лукашэнка дамовіліся правесці сустрэчу да канца 2016 года.

15 лістапада дэлегацыя Беларусі на пасяджэнні Трэцяга камітэта Генеральнай Асамблеі ААН прапанавала не разглядаць парадак дня камітэта, а таксама галасавала супраць рэзалюцыі аб правах чалавека ў анэксаваным Крыме. За праект рэзалюцыі прагаласавалі 73 краіны, супраць – 23, яшчэ 76 устрымаліся.

Каментуючы пазіцыю Беларусі ў ААН, у МЗС краіны заявілі, што разгляд пытання правоў чалавека не мае ніякага дачынення да тэмы тэрытарыяльнай цэласнасці Украіны.