Генпракуратура: Узнагароджанне грамадзян за інфармацыю аб хабарах - не навіна

Улады матывуюць беларусаў за грошы «здаваць» карупцыянераў.

Узнагароджанне грамадзян за інфармацыю пра карупцыйныя злачынствы не з'яўляецца навіной. Пра гэта заявіў на брыфінгу ў Менску 9 лютага начальнік управы барацьбы з карупцыяй і арганізаванай злачыннасцю Генеральнай пракуратуры Беларусі Ігар Грэйба, каментуючы пастанову ўрада №101, паведамляе БелаПАН.

«Мяркуем, што прыняцце гэтай пастановы і ўжыванне яе нормаў будзе садзейнічаць павышэнню ўзроўню актыўнасці нашых грамадзян у супрацьдзеянні карупцыі», - сказаў Грэйба.

Ён падкрэсліў, што практыка ўзнагароджання асоб, якія валодаюць інфармацыяй аб карупцыйных злачынствах, існуе ў шэрагу краін. Такія захады, са слоў Грэйбы, дзейнічаюць і ў Беларусі - яны, між іншым, прадугледжаныя заканадаўствам аб аператыўна-вышуковай дзейнасці.

Пастанова №101 была прынятая Саветам міністраў Беларусі 5 лютага.

Яна прадугледжвае выплаты грамадзянам у выпадках: «падавання інфармацыі, прадметаў і дакументаў, якія б садзейнічалі выяўленню карупцыйнага злачынства; звестак пра месцазнаходжанне шуканай асобы, якая ўчыніла карупцыйнае злачынства; інфармацыі пра месцазнаходжанне грашовых сродкаў i iншай маёмасцi, атрыманых у выніку ўчынення карупцыйнага злачынства; садзейнічання прадухіленню або кампенсацыі шкоды, нанесенай карупцыйным злачынствам; аказання іншага садзейнічання органам крымінальнага пераследу, які меў значэнне для супрацьдзеяння карупцыйным злачынствам».

Калі гаворка ідзе пра цяжкія ці асабліва цяжкія злачынствы, сума выплат складзе да 50 базавых велічынь, менш цяжкія - да 30 базавых (базавая велічыня цяпер складае 210 тыс. рублёў).

Прадугледжаная таксама «выплата кампенсаванага характару да 10 базавых велічынь на падставе дакументаў, якія пацвярджаюць выдаткі фізічнай асобы». Выплата прызначаецца пракуратурай на падставе хадайніцтва органа крымінальнага пераследу пры прыняцці пастановы аб крымінальнай справе, што паступіла для накіравання ў суд, і ў некаторых іншых выпадках.

Дзеянне дакумента не распаўсюджваецца на вайскоўцаў або супрацоўнікаў дзяржорганаў і іншых арганізацый, якія змагаюцца з карупцыяй, а таксама на ўдзельнікаў працэсу пры вытворчасці крымінальных спраў.

«Выплата ўзнагароджання і іншых выплат не вядзецца фізічным асобам, якія аказваюць садзейнічанне ў выяўленні, спыненні, раскрыцці або расследаванні карупцыйнага злачынства, ва ўчыненні якога яны ўдзельнічалі», - падкрэсліваецца ў пастанове.