МЗС Беларусі выказаўся за захаванне смяротнага пакарання

Намеснік кіраўніка беларускага МЗС Валянцін Рыбакоў сцвярджае, што такое меркаванне большасці беларусаў.

Пра гэта намеснік міністра замежных спраў Валянцін Рыбакоў заявіў на міжнароднай канферэнцыі «Смяротнае пакаранне: пераадоленне рознагалоссяў», якая праходзіць 10 сакавіка ў Менску, паведамляе БелаПАН.

«Як усім нам добра вядома, большасць беларускіх грамадзян на рэферэндуме 1996 года выказалася за захаванне смяротнага пакарання. І неаднаразовыя сацыялагічныя апытанні, якія праводзіліся, сведчаць пра тое, што смяротнае пакаранне па-ранейшаму па-рознаму ўспрымаецца ў грамадстве і па-ранейшаму маецца большасць прыхільнікаў яго захавання. Намі гэты факт ігнаравацца не можа і не будзе, у тым ліку і ў кантэксце нашага дыялогу з нашымі паважанымі еўрапейскімі партнёрамі», - заявіў Рыбакоў.

Ён нагадаў, што ў айчынным заканадаўстве замацаваны часовы характар прымянення смяротнай кары, і адзначыў, што ў краіне пры ўжыванні пакаранняў дзейнічаюць больш жорсткія абмежаванні, чым устаноўленыя для смяротнага пакарання ў Міжнародным пакце аб грамадзянскіх і палітычных правах.

«Наша краіна займае на міжнароднай арэне ўзважаную пазіцыю ў пытанні прымянення смяротнага пакарання. Пры разглядзе Генасамблеяй ААН пытання аб мараторыі на смяротнае пакаранне мы традыцыйна ўстрымліваемся пры галасаванні», - сказаў Рыбакоў.

Намеснік міністра адзначыў, што Беларусь гатова абмяркоўваць пытанні смяротнага пакарання, аднак «развязання любых праблем варта шукаць не ў плоскасці канфрантацыі, а шляхам паважлівага дыялогу, улічваючы асаблівасці і нацыянальныя інтарэсы краіны».

Канферэнцыя арганізавана прадстаўніцтвам ААН у Беларусі пры фінансавай падтрымцы пасольства Вялікабрытаніі. Сярод удзельнікаў мерапрыемства - спецпрадстаўнік ЕЗ у правах чалавека Стаўрас Ламбрынідзіс, спецдакладчык Парламенцкай асамблеі Рады Еўропы ў сітуацыі ў Беларусі Андрэа Рыгоні, старшыня камітэта замежных спраў Палаты дэпутатаў Чэхіі Карэл Шварцэнбэрг, амбасадарка Вялікабрытаніі ў Беларусі Фіёна Гіб, прадстаўнік ПРААН у Беларусі Санака Самарасінха і шэраг замежных экспэртаў.

Беларусь застаецца адзінай краінай у Еўропе, дзе дагэтуль ужываецца смяротнае пакаранне. З гэтай прычыны Беларусь таксама з'яўляецца адзінай еўрапейскай краінай, якая не ўваходзіць у Раду Еўропы. За ўсю гісторыю незалежнай Беларусі было вынесена 406 смяротных прысудаў, прычым два апошнія - з пачатку 2016 года. Адзін з іх быў вынесены 15 лютага, у дзень зняцця Еўразвязам санкцыяў у дачыненні да Беларусі, нягледзячы на тое, што ў пастанове Рады ЕЗ аб зняцці санкцый асобным радком гаворыцца пра неабходнасць увядзення мараторыя на смяротнае пакаранне як першага кроку да яго поўнага скасавання.