Гульцоў «Іслачы» падазраюць у арганізацыі дамоўленых матчаў
1- 10.08.2016, 11:17
- 14,022
Следчы камітэт пачаў крымінальную справу ў дачыненні да гульцоў і прадстаўніка трэнерскага штаба футбольнага клуба «Іслач».
Іх падазраюць у арганізацыі дамоўленага матчу, паведамляе БелаПАН.
Гаворка ідзе пра сустрэчу «Іслачы» з берасцейскім «Дынама» 30 красавіка. Са слоў праваахоўнікаў, падазраваныя гульцы павінны былі забяспечыць паразу камандзе са сталічнага рэгіёну або нічыю ў першым тайме.
Старшы оперупаўнаважаны ў асабліва важных справах ГУБАЗіК МУС Сяргей Ванагель паведаміў, што ў арганізацыі дамоўленых матчаў ўдзельнічаў былы беларускі футбаліст, які выступіў пасярэднікам. Ён звёў прадстаўнікоў «Іслачы» з грамадзянамі, якія прыбылі з Расеі, якія гатовыя былі заплаціць ад 10 да 20 тысяч даляраў, каб забяспечыць патрэбны вынік. Сума «ганарараў» вагалася ў залежнасці ад каціровак ў букмекерскіх канторах на канкрэтны матч.
Перад матчам каэфіцыенты на перамогу ФК «Дынама» (Берасце) у некаторых букмекерскіх канторах былі 1 да 8.