Як выглядае «сярэдні» беларускі беспрацоўны
7- 22.01.2017, 12:26
- 18,611
За борт луканомікі пападаюць маладыя дужыя мужчыны, звольненыя паводле «дамовы бакоў».
На 1 студзеня 2017 года 66% усіх беспрацоўных на ўліку - мужчыны, удзельная вага моладзі ва ўзросце 16-30 гадоў - 23,8%. Для параўнання: год таму ў структуры беспрацоўных было 65% мужчын і 26,7% моладзі. Ва ўправе палітыкі занятасці Міністэрства працы і сацыяльнай абароны падалі партрэт сярэднестатыстычнага беспрацоўнага, паведамляе БелТА.
Рэгістрацыя мужчын у якасці беспрацоўных удвая перавышае рэгістрацыю беспрацоўных жанчын. На 1 студзеня 2017 года самая высокая ўдзельная вага беспрацоўных мужчын адзначалася ў Менску і Гарадзенскай вобласці (73,6% і 72% адпаведна), менш за ўсё - у Магілёўскай вобласці (50,3%). Сярэдні ўзрост беспрацоўнага змяніўся нязначна: у 2016 годзе - 31,5 года, у 2015 годзе - 31,4 года. Сярэдні ўзрост беспрацоўнага мужчыны нязначна знізіўся, у беспрацоўных жанчын ён захаваўся ранейшым (37,5 года).
Менш становіцца беспрацоўных з агульнай сярэдняй і базавай адукацыяй (цяпер іх удзельная вага - 40%), а беспрацоўных з прафесійна-тэхнічнай адукацыяй - больш (32,5%). Сярэднюю спецыяльную адукацыю маюць 14,3% ад усіх беспрацоўных на ўліку, вышэйшую і адукацыю пасля ВНУ - 14,2%.
Са слоў спецыялістаў, у 2016 годзе сярэдняя працягласць беспрацоўя павялічылася на 0,1 месяца ў параўнанні з папярэднім годам і склала 4,2 месяца. Гэты паказчык у мужчын узрос да 4,2 месяца, у жанчын і моладзі знізіўся да 4 і 3 месяцаў адпаведна.