Паводле якой схемы дзейнічаюць азіяцкія гандляры

Крамы прадаўжаюць працаваць нават пасля праверак мытнікаў.

Крамы таннага адзення ў трох рэгіянальных цэнтрах правяралі гомельскія мытнікі. У Рэчыцы, Рагачове і Жлобіне канфіскаваныя адзенне, абутак, галантарэя. Прычына - адсутнасць дакументаў аб паходжанні тавараў, піша сайт «Бабруйскі кур'ер».

Гісторыя незадаволенасці такімі крамамі пачалася ўвесну. Праўда, раздражненне яны выклікалі толькі ў ІП - канкурэнтаў гэтых прадаўцоў. Бо ўладальнікі гэтых гандлёвых месцаў абралі галоўным «козырам» нізкія кошты. Ад гэтага прыбытак у іншых прадпрымальнікаў катастрафічна ўпаў. Яны забілі трывогу: накіроўвалі ў кантрольныя органы лісты аб парушэнні з боку «ўзбекскіх» крамаў (такую назву далі ім ІП). Да прыкладу, іх абвінавачваюць у нявыплаце розных мыт.

Таксама прадпрымальнікі скардзіліся на адсутнасць праверак крамаў таннага адзення. На што ў аддзелах гандлю кажуць пра мараторый на паверкі - указ прэзідэнта №510. Ён гучыць так «Аб удасканаленні кантрольнай (нагляднай) дзейнасці ў Рэспубліцы Беларусь». У адпаведнасці з гэтым указам забароненыя праверкі цягам двух гадоў з дня ўтварэння фірмы.

Аднак існуюць агаворкі. Напрыклад, можна праводзіць маніторынгі. Калі знаходзяць парушэнні, то кіраўніцтву накіроўваюць рэкамендацыі для іх ліквідацыі. Так адбываліся шматлікія маніторынгі аб выніках заяў і скаргаў.

І вось, у верасні адную бабруйскую краму таннага адзення наведала фінансавая міліцыя. Знайшлі амаль 7 тысяч рублёў; як мяркуецца, не улічаныя. Таксама адсутнічалі сертыфікаты на тавары. Было складзена мноства адміністрацыйных пратаколаў. А гэта - вялікія штрафы.

А цяпер мытня апублікавала вынікі праверак у тых райцэнтрах Гомельшчыны. Яны, дарэчы, таксама праведзеныя ў верасні. Высвятляецца, мабільныя групы наведалі чатыры крамы ў трох гарадах. Вынікам была адсутнасць дакументаў на тавар. Адпаведна і паходжанне прадукцыі - невядомае. Было канфіскаванае адзенне і іншы тавар на суму 21 тысяча рублёў. Гомельская мытня пачала адміністрацыйныя працэсы за незаконную прадпрымальніцкую дзейнасць.

У той жа час правераныя крамы працягваюць працаваць. У іх завозяць тавар, як напрыклад, у Рэчыцы. І больш за тое, крамы таннага адзення, у першую чаргу, задавальняюць інтарэсы звычайных грамадзян. Асабліва, калі ўлічваць слабы прырост даходу насельніцтва.