У справе аб гібелі жаўнера Коржыча з'явіліся новыя падазраваныя

CК заявіў аб чатырох новых фігурантах справы.

Паводле справы аб гібелі вайскоўца Аляксандра Коржыча ў Печах з'явілася чацвёра новых падазраваных. Пра гэта 1 лістапада паведаміла афіцыйная прадстаўніца Следчага камітэта Беларусі Юлія Ганчарова, паведамляе «Радыё Свобода».

«Чацвёра падазраваных раней не затрымліваліся, таму пра іх размова не ішла», - адзначыла Юлія Ганчарова.

На 1 лістапада паводле крымінальнай справы аб гібелі Коржыча выстаўленае абвінавачванне 10 вайскоўцам: 8 сяржантам, прапаршчыкам і афіцэрам. Яшчэ адзін афіцэр знаходзіцца ў статусе падазраванага, да яго ўжытая мера працэсуальнага прымусу - абавязацельства аб прыходзе.

Учора ў Следчым камітэце паведамілі, што капітан Чыркоў - адзін з двух афіцэраў, затрыманых у справе Коржыча - вызвалены.

Прадстаўніца Следчага камітэта сказала карэспандэнту «Свабоды», што «ўся неабходная інфармацыя была агучаная Следчым камітэтам учора»: «Як толькі нам будзе нешта дадаць, інфармацыя будзе з'яўляцца на сайце Следчага камітэта».

Справа Коржыча

3 кастрычніка цела жаўнера тэрміновай службы Аляксандра Коржыча знайшлі ў падвале вайсковай часткі ў Печах пад Барысавам. Пасля праверкі, якую правялі ў вайсковай частцы, прычынай смерці жаўнера нібыта стаў суіцыд. Але сваякі і сябры Аляксандра Коржыча з гэтай версіяй не пагадзіліся і перадалі ў рэдакцыю «Свабоды» фатаграфіі ягонага цела са слядамі прыжыццёвых траўмаў. Справа атрымала вялікі рэзананс у грамадстве.

13 кастрычніка Следчы камітэт выступіў з афіцыйнай заявай для прэсы.

Са слоў прадстаўніка Следчага камітэта Сяргея Кабаковіча, цела Коржыча блізу 17 гадзін 3 кастрычніка знайшлі «ў пятлі з рамяня для штаноў, прымацаванай вольным канцом да металічнай арматуры пад столлю склепа, з перавязанымі шнурком абутку нагамі і надзетай на галаву майкай».

Яшчэ ў верасні Коржыч быў у медчастцы з вострай рэспіратарнай інфекцыяй, і тады яго аглядаў псіхіятр. Дыягназ: «быў «здаровы». Пасля таго, як Коржыча выпісалі 26 верасня, звестак пра ягонае далейшае месцазнаходжанне ў следчых дакументах няма.

Супраць старшыны роты, які скраў з карткі Коржыча не менш за 150 рублёў і рабіў аплаты «без ведама ўладальніка ў асабістых мэтах у крамах і кавярнях Барысава», распачалі крымінальную справу аб махлярстве. Сяржанты з вайсковай часткі праходзяць падазраванымі ў справе аб нестатутных дачыненнях, таксама «прымаюцца пастановы аб іх затрыманні».