СМІ: У РФ беларуса, які справакаваў аварыю, шукалі 100 чалавек

Беларус справакаваў аварыю з машынай дарожнай паліцыі ў Ленінградскай вобласці і схаваўся.

Пра здарэнне паведамілі ўчора раніцай у прэс-службе Галоўнай управы МУС Расеі ў Санкт-Пецярбургу і Ленінградскай вобласці. Паводле першапачатковай інфармацыі, рана ранкам на дарозе Санкт-Пецярбург – Пскоў у Гатчынскім раёне кіроўца на Volkswagen «не прадставіў перавагу ў руху патрульнаму аўтамабілю і здзейсніў з ім сутыкненне, пасля чаго схаваўся». Пачаліся пошукі.

У выніку ДТЗ былі шпіталізаваныя два інспектары ДПС. Праз некалькі гадзінаў аўтамабіль, які справакаваў аварыю, быў знойдзены ў пасёлку Нікольскае. Затрымалі трох. У расейскім МУС інфармуюць, што асобу аднаго затрыманага вызначылі адразу – гэта 35-гадовы грамадзянін «адной з краінаў блізкага замежжа». Якой менавіта, у паліцыі не сказалі. Паводле інфармацыі сайта 47news.ru, гаворка пра грамадзяніна Беларусі.

Рэсурс прыводзіць падрабязнасці. Паведамляецца, што падазраваны прыехаў халтурыць з Беларусі і, паводле папярэдніх звестак, быў нападпітку.

Паводле інфармацыі 47news, экіпаж ДІБДР рухаўся ў напрамку Санкт-Пецярбурга. Насустрач ехаў мікрааўтобус Volkswagen Crafter. Нечакана ягоны кіроўца стаў разварочвацца ў процілеглы бок і выехаў на сустрэчную паласу. 34-гадовы супрацоўнік, які сядзеў за рулём паліцэйскай машыны, паспеў сысці ад сутыкнення – машына вылецела ў кювет. Там яе некалькі разоў ударыла аб сценкі канавы. На пасажырскім сядзенні знаходзіўся 43-гадовы напарнік кіроўцы.

Кіроўца мікрааўтобуса схаваўся на вялікай хуткасці, нягледзячы на тое, што параненым паліцыянтам, відавочна, патрэбная была дапамога. На гэты момант супрацоўнікі ДІБДР праапераваныя і знаходзяцца ў стабільна цяжкім стане.

Паводле звестак УДІБДР, у пошуках удзельнічалі блізу ста супрацоўнікаў установы і дружыннікаў. Былі паднятыя і тыя, хто адсыпаўся пасля дзяжурства. Вызначана, што разам з кіроўцам у мікрааўтобусе былі ягоны брат і сяброўка брата. Яны таксама затрыманыя. Высветлілася, што кампанія схавала аўтобус у дварах пасёлка Нікольскі. Пра меркаванага вінаватага ў аварыі вядома, што ён прыехаў у Ленобласть у пошуках працы.

Развязваецца пытанне наконт распачынання крымінальнай справы. Абставіны ДТЗ вывучаюць супрацоўнікі Галоўнай следчай управы ГУ МУС у Санкт-Пецярбургу і Ленінградскай вобласці.