Рада БНК: Галоўная акцыя - 25 сакавіка 2018 года

Рада Беларускага Нацыянальнага Кангрэсу звярнулася да грамадзян краіны.

Cайт Charter97.org прыводзіць тэкст заявы Рады БНК:

«Ніхто не прынясе нам свабоду, і не падорыць годнае жыццё. Зрабіць сваю краіну свабоднай і годнай нельга без рызыкі, самаахвярнасці, мужнасці і волі. Мы стараемся прымусіць незаконны, бандыцкі, ненавісны народам рэжым да змен, у тым ліку праз мірныя вулічныя акцыі. Мы дамагаемся, каб у нашай краіне былі праведзеныя сумленныя прэзідэнцкія і парламенцкія выбары пад міжнародным кантролем. Мы хочам абараніць інтарэсы простых людзей.

Прымусіць рэжым да мірных перамен - гэта самаадданы шлях у першую чаргу для тых, хто бярэ на сябе адказнасць за пратэстныя акцыі, хто праз іх сутыкаецца з рэпрэсіямі. Але іншага шляху да перамен няма.

На гэтым шляху ў нас ёсць поспехі. Вясной рэжым, напалоханы народнымі пратэстамі, быў вымушаны прыпыніць дзеянне падатку на «дармаедства». А гэтай восенню, напярэдадні Марша абураных беларусаў 2.0, адмовіўся ад ужо запланаванага з 1 кастрычніка новага варыянту падатку на «дармаедства». Напалоханыя Маршам улады павінны былі адрэагаваць і на народнае абурэнне забойствамі навабранцаў у войску.

Рэжым таксама нясе страты праз рэпрэсій, якім падвяргае арганізатараў пратэстаў. Мінулай вясной народ канчаткова зразумеў, што краіна акупаваная незаконнай, ілжывай уладай, што намі кіруе банда злачынцаў. Міжнародныя «адбельвальнікі» рэжыму павінны былі прыцішыць свой запал. Рэжым не змог атрымаць мільярды крэдытаў на ўтрыманне вялізнага войска сваіх «сілавікоў» і чыноўнікаў.

Наш шлях да свабоды і годнага жыцця нялёгкі. У народнай барацьбе за свабоду і годнасць бываюць спады і ўздымы. Але вельмі важна, каб барацьба не перарывалася, каб заўсёды знаходзіліся смелыя людзі, здольныя падняць сцяг барацьбы, каб супраціў рэжыму не спыняўся. Бо як толькі мы прыпынім супраціў, рэжым можа перакрэсліць дасягненні нашай барацьбы.

Беларускі Нацыянальны Кангрэс вядзе чарговы этап сваёй кампаніі «Улада - народу!». Гэта наша барацьба супраць спробаў рэжыму разважаць свае праблемы за кошт збяднення людзей. Мы плануем перанесці наш пратэст у рэгіёны, дзе будзем прапаноўваць новыя формы пратэсту.

Галоўная акцыя кампаніі «Улада - народу!», якую мы плануем правесці сумесна з усімі беларускімі дэмакратычнымі сіламі, пройдзе ў 100-ю гадавіну Дня Волі - 25 сакавіка наступнага года. Яна пачнецца на менскай плошчы Якуба Коласа. Мы абаронім нашу свабоду, даможамся народаўладдзя. Разам мы зробім Беларусь дэмакратычнай, свабоднай і квітнеючай».