«Я не буду плаціць нават гэтыя капейкі ад акладу: пайду да канца»

Як прафзвяз РЭП абараняе чатырох работнікаў, абвінавачаных у нястачы.

Адбылося яшчэ адно пасяджэнне паводле справы Гомельскага тлушчавага камбіната, раней прыпыненай на нявызначаны тэрмін праз тое, што справа адпраўлена на больш пільную праверку АБЭЗ, каб выявіць вінаватых і прыцягнуць да крымінальнай адказнасці. Справа доўжыцца з 5 лютага 2017 года, піша praca-by.info.

У гэтай справе прафзвяз РЭП абараняе чатырох работнікаў, якія ўступілі ў незалежны прафзвяз: іх інтарэсы прадстаўляе прававы інспектар працы Леанід Судаленка.

- Трое з працаўнікоў тлушчавага камбіната, сябры РЭПа, склалі сусветную дамову з наймальнікам, заплацілі невялікую суму ад акладу па калектыўнай дамове і выбылі з барацьбы. Працягвае спрачацца з тлушчавы камбінат толькі Аксана Сарока. Яна ўжо даўно працуе ў іншым месцы, але сказала: «Я сябе вінаватай не прызнаю! Я не буду плаціць нават гэтыя капейкі ад акладу: я пайду да канца».

Прафзвязны юрыст яшчэ раз нагадаў, у чым менавіта абвінавачвае тлушчавы камбінат сваю былую супрацоўніцу:

- Смешна выглядае абвінавачанне, выстаўленае Аксане Сароцы, якая працавала ў аддзеле забеспячэння. Яна купляла, да прыкладу, харчовыя дабаўкі, якія пастаўшчык пакуе па 20 кілаграм - меншай упакоўкі няма. Як караць яе за тое, што яна купіла дваццаць кілаграм, а вытворчасць патрабуе дзесяць? Гэта ўсё роўна, што караць чалавека за тое, што ён купіў літр малака, а для бліноў па рэцэпце трэба выдаткаваць 100 мілілітраў. Вытворца не пакаваў гэтыя дадаткі ў тару меншага аб'ёму! - а Аксану Сароку хочуць пакараць за тое, што рэшткі нібыта прапалі з ейнай віны.

Пасля пасяджэння справа зноў была прыпыненая на нявызначаны тэрмін: да заканчэння расследавання.